Bir jylda 60 shaqty bala terezeden qulap ketken

<p>ASTANA. KAZINFORM — Jyl basynan beri 14 bala terezeden qulap ketken. Bul jaıly Bala quqyqtaryn qorǵaý komıtetiniń basshysy Nasymjan Ospanova áleýmettik jelide habarlady. </p>

Onyń aıtýynsha, jyl saıyn bıik úılerdiń terezesinen qulap túsken balalar sany ósip keledi.

Máselen 2023 jyly — 59 qaıǵyly oqıǵa, al 2024 jyldyń 4 aıynda −14 jaǵdaı bolǵan.

Bul qorqynyshty sandar — qur statıstıka emes. Ár oqıǵanyń artyna úńiletin bolsaq aldyn alýǵa bolatyn shynaıy tragedııa jatyr. 

«Biz sizden terezege arnaıy buǵattaǵysh ornatýdy suraımyz. Qarapaıym erejelerdi oryndaý balanyń terezeden túsýiniń aldyn alýǵa, onyń densaýlyǵy men ómirin saqtaýǵa kómektesedi. Úıińizdiń terezeleri senimdi jabylǵanyna jáne balanyń qoly jetpeıtinine kóz jetkizińiz. Sondaı-aq, balańyzdy eshqashan qaraýsyz qaldyrmańyz. Bir sáttik nemquraılyq úlken qasiretke aınalýy múmkin. Balalarymyzdyń qýanyshty kúlkisi men alańsyz balalyq shaǵy úshin asa muqııat jáne qyraǵy bolýymyz kerek. Ata-analar, balalaryńyzǵa qamqor bolyńyzdar! Ár bala baqytty jáne qaýipsiz balalyq shaqqa laıyq ekenin este ustaǵan jón» dep eske salady Nasymjan Ospanova.