Bir jarym jylda memleketke 857 mlrd teńgeniń múliktik aktıvter men aqsha qaıtaryldy - agenttik

<p>Bıylǵy 17-18 qazan aralyǵynda Agenttik delegatsııasy Beıjiń qalasynda ótken &laquo;Bir beldeý, bir jol&raquo; halyqaralyq yntymaqtastyqtyń III forýmy aıasynda jemqorlyqqa qarsy forýmǵa qatysty.</p>

Bul týraly Kazinform QR Sybaılas jemqorlyqqa qarsy is-qımyl agenttiginiń baspasóz qyzmetine silteme jasap habarlaıdy.

31 eldiń delegattary men halyqaralyq uıymdardyń ókilderi jemqorlyqqa qarsy is-qımyl máselelerinde yntymaqtastyqty nyǵaıtý jáne qatysýshy elderdiń jemqorlyqqa qarsy vedomstvolarynyń kúsh-jigerin biriktirý arqyly parasattylyqty qamtamasyz etý qaǵıdattaryn, «Taza Jibek jolyn» qurý jónindegi bastamalardy talqylady.

Agenttik tóraǵasy Ashat Jumaǵalı Qazaqstannyń Sybaılas jemqorlyqqa qarsy qyzmeti týraly habardar etti.

Máselen, Sybaılas jemqorlyqqa qarsy is-qımyl agenttiginiń bastamasy boıynsha halyqaralyq standarttardy eskere otyryp, zańnamalyq deńgeıde baǵynystylardyń sybaılas jemqorlyǵy úshin basshylardyń derbes jaýapkershiligi kózdelgen; sybaılas jemqorlyq qylmystary úshin sottalǵandardy merziminen buryn bosatý alynyp tastaldy; quqyq qorǵaý organdarynyń qyzmetkerleri, sýdıalar, para berýshiler men paraqorlyqtaǵy deldaldar úshin sanktsııalar qatańdatyldy.

Budan basqa, negizsiz baıytý úshin sheneýnikterdiń jaýapkershiligin kózdeıtin tetik engizildi jáne jemqorlyq týraly habarlaǵan adamdardy qorǵaý jónindegi sharalar kúsheıtildi.

Sonymen qatar, kezdesýge qatysýshylar aktıvterdi qaıtarý máselelerin qarastyrdy. Qazaqstannyń Sybaılas jemqorlyqqa qarsy qyzmetimen sońǵy bir jarym jylda 857 mlrd teńge somasyna múliktik aktıvter men aqshalaı qarajat qaıtaryldy.

Zańsyz aktıvterdi qaıtarý jumystary jalǵasýda. Tıimdilikti arttyrý maqsatynda sheteldik áriptesterdiń ozyq tájirıbesi zerttelýde.

Osyǵan baılanysty, forým barysynda Saýd Arabııasy, Gonkong, Sıngapýr, Egıpet sybaılas jemqorlyqqa qarsy vedomstvolarynyń basshylarymen, sondaı-aq BUU Esirtki jáne qylmys jónindegi basqarmasynyń atqarýshy dırektory Gada Valımen birqatar ekijaqty kezdesýler ótkizildi.

Sondaı-aq, Qazaqstannyń Antıkory jemqorlyqqa qarsy is-qımyl jáne aktıvterdi qaıtarý máselelerin Qytaıdyń jemqorlyqqa qarsy fýnktsııalary shoǵyrlanǵan Memlekettik qadaǵalaý komıssııasymen talqylady.

Bıylǵy qazan aıynyń sońynda Qytaıdyń memlekettik qadaǵalaý komıssııasynyń basshylyǵy vedomstvoaralyq ózara is-qımyldy odan ári nyǵaıtý úshin Qazaqstanǵa barýdy josparlap otyr.

Qazaqstannyń «Bir beldeý jáne bir jol» bastamasyna qatysýy qatysýshy elder arasyndaǵy ózara tıimdi yntymaqtastyqtyń berik negizin qalaıdy.