Bir úıde — 937 adam: Elimizde 22 myń sheteldik «rezeńke» páterlerde tirkeýde turǵan

<p>ASTANA. KAZINFORM &mdash; Bas prokýratýranyń alqa otyrysynda Bas prokýror Berik Asylov mıgratsııa aǵynynyń ulǵaıýy jaǵdaıynda kóshi-qondy baqylap qana qoımaı, eldiń ekonomıkalyq jáne áleýmettik damýyna yqpal etetindeı etip baǵyttaý qajet ekenin atap ótti.</p>

Mamyr aıynda Memleket basshysy kóshi-qon salasyndaǵy zańnamany odan ári jetildirýge baǵyttalǵan túzetýler engizetin zańǵa qol qoıdy.

Bul zań ekstremıstik nemese terrorıstik uıymdarǵa qatysy, qylmystardyń qaıtalanýy bar uıymdasqan qylmystyq toptarǵa jetekshilik etetin, kámeletke tolmaǵandardyń jynystyq tıispeýshiligine qarsy qylmystar, sondaı-aq Qazaqstanda aýyr nemese asa aýyr qylmystar jasaǵan jáne halyqaralyq sharttar negizinde óz azamattyǵy eline berilgen adamdardyń kirýine tyıym salý úshin negizder tizbesin keńeıtti.

Osyǵan baılanysty Bas prokýror osy túzetýlerdi iske asyrý tetikterin ázirleý qajettigin atap ótti.

Óz kezeginde, zańsyz kóshi-qon qylmystyq jaǵdaıdy qıyndatady, elge radıkaldy, destrýktıvti jáne qylmystyq elementterdiń ený qaýpin arttyrady.

Otyrys barysynda prokýrorlyq tekseristerdiń nátıjeleri baıandaldy.

Alty óńirde (Jambyl, Túrkistan, Soltústik Qazaqstan, Qaraǵandy oblystary, Almaty jáne Astana qalalary) prokýrorlar zańsyz kóshi-qon arnalaryn anyqtap, sotqa deıingi tergep-tekserýdi bastady.

Mysaly, Qaraǵandy oblysynda HQO, medıtsınalyq mekemeler men «kómekshiler» dep atalatyn qyzmetkerlerdi qamtıtyn qylmystyq toptyń jumysy toqtatyldy, olar aqsha úshin eńbek sharttaryn, medıtsınalyq anyqtamalardy qoldan jasap, turǵyn úıdi jalǵan tirkeýdi resimdegen.

Qordaı aýdanynda Jambyl oblysy prokýratýrasynyń úılestirýimen 20 pákistandyqtyń shekarany zańsyz kesip ótýine kómektesken Qazaqstan men Qyrǵyzstannyń úsh azamaty ustaldy.

Onyń biri mıgranttardy kólikpen jáne turǵyn úımen qamtamasyz etken. Ol qazir sottaldy, qalǵan ekeýine qatysty is sotqa joldandy (M. esimdi azamat bas bostandyǵynan aıyryldy, A. jáne O. esimdi azamattarǵa qatysty is sotqa jiberildi).

Prokýrorlar jalǵan mekenjaıda jáne «rezeńke» páterlerde tirkelgen 22 myń sheteldikti anyqtady.

Astanadaǵy bir páterde sheteldikterdi qosqanda 937 adam tirkelgen, biraq onda bir ǵana otbasy turǵan.

Almaty oblysynda osyndaı 13 myń fakti anyqtaldy.

Tekseris nátıjesi boıynsha qujattardy qoldan jasaýǵa, shekarany zańsyz kesip ótýge, sot aktilerin oryndamaýǵa jáne basqa da buzýshylyqtarǵa baılanysty barlyǵy 42 sotqa deıingi tergep-tekserý bastaldy.

Qazirgi jaǵdaıda kóshi-qon protsesterin tıimdi basqarý eldiń qaýipsizdigin, turaqtylyǵyn jáne damýyn qamtamasyz etýdiń negizgi elementine aınalady.

Osyǵan baılanysty alqa qorytyndysy boıynsha shekaralardyń ınjenerlik-tehnıkalyq qorǵalýyn nyǵaıtýdy, aqparattyq júıelerdi jańǵyrtý men ıntegratsııalaýdy, sondaı-aq zańnamalyq túzetýlerde kózdelgen jańa erejelerdi iske asyrý sharalaryn pysyqtaýdy kózdeıtin keshendi sharalar ázirlendi.