Bir ýaqytta 2 mıllıonǵa jýyq oqýshy asyq atyp oınady

<p>Búgin elimizdegi jeti myńnan astam bilim berý uıymynda bir mezette "Altyn saqa" ulttyq oıyndardyń respýblıkalyq chellendji ótti. Bul bastama búkil oqýshylar men muǵalimderdi biriktirýge, ulttyq rýhty jáne qoǵamdaǵy turaqtylyqty nyǵaıtýǵa baǵyttalǵan. Elordalyq oqýshylardyń saıysyna Ǵanı Beısembaev ta qatysty, dep habarlaıdy <a href="https://kaz.inform.kz/" target="_blank" rel="noopener">Kazinform</a>.</p>

Oqý-aǵartý mınıstri ulttyq oıyndarymyzdy jańǵyrtý, nasıhattaý jáne damytý bizdiń myzǵymas qundylyqtarymyzdy — birlik, kelisim men beıbitshilikti nyǵaıtatynyn, sondaı-aq bilim oshaqtaryndaǵy rýhanı-adamgershilik mádenıetti arttyra túsenin atap ótti.

Foto: Oqý-aǵartý mınıstrligi

«Ulttyq oıyndar — pedagogıkanyń dástúrli quraly. Ǵasyrlar boıy olarda ulttyq bolmysymyz, halyqtyń eńbegi, ar-namys, er júrektilik, batyrlyq, erik-jiger men jeńiske degen umtylysy aıqyn kórinis tapqan. Ulttyq oıyndardyń óskeleń urpaq arasynda keń tanylyp kele jatqany qýantady. Sonyń bir dáleli retinde, búgin eki mıllıonǵa jýyq oqýshy elimizdiń mádenı murasyn saqtaýdaǵy birligin taǵy da kórsetti. Biz jas urpaqty naǵyz patrıot retinde tárbıeleýimiz kerek», — dep atap ótti elimizdiń bas ustazy.

Foto: Oqý-aǵartý mınıstrligi

Memleket basshysynyń Ulttyq quryltaıdyń «Ádiletti Qazaqstan — adal azamat» atty ekinshi otyrysynda aıtqan mańyzdy maqsattarynyń birine qol jetkizý úshin mınıstrlik jalpyadamzattyq jáne ulttyq qundylyqtar, patrıotızm men eńbekqorlyq, etnomádenı toleranttylyq qaǵıdattaryna negizdelgen «Biryńǵaı ulttyq tárbıe baǵdarlamasy» aıasynda birqatar sharalardy júzege asyryp jatyr. 

Foto: Oqý-aǵartý mınıstrligi

Bul sharalardyń barlyǵy elimizdegi bilim mekemelerin biriktirýge jáne bilim alýshylardyń qazaqtyń tarıhy men mádenıetine qyzyǵýshylyǵyn arttyrýǵa baǵyttalǵan.

Foto: Oqý-aǵartý mınıstrligi