Bir týrnırden bes joldama alý, bul jaman kórsetkish emes – Myrzaǵalı Aıtjanov

<p>ASTANA. KAZINFORM &ndash; Italııanyń Býsto-Arsıtsıo qalasynda ótken halyqaralyq lıtsenzııalyq týrnırden keıin bokstan Ulttyq quramanyń bas bapkeri shákirtteri týraly óz oıymen bólisti.</p>

«Lıtsenzııalyq týrnırge alyp barǵan alty boksshymyzdyń beseýi joldamaǵa qol jetkizdi. Bul jaman kórsetkish emes. Negizi tolyq quramda joldamaǵa qol sozǵanda tipten jaqsy bolar edi. Jalpy, shákirtterimniń qol jetkizgen jetistikteri kóńilimnen shyqty. Bas bapker retinde, boksshylarǵa jaýapty azmat retinde óz shákirtterimniń bul jolǵy jetistigin joǵary deńgeıde baǵalaımyn. Boksshylarymyz barlyq tapsyrmany, biz úıretken aıla-tásildi buljytpaı oryndady. Nátıjesinde bir boksshydan basqasy kózdegen maqsattaryna jetti», - dep atap ótti bokstan Ulttyq quramanyń bas bapkeri Myrzaǵalı Aıtjanov. 

Sonymen qatar Aıtjanov árqashan «aryq aıtyp, semiz shyǵýǵa» tyrysatynyn jasyrmady.

«Osyndaı iri jarys aldynda «jýrnalıster tarapynan da, basshylyq tarapynan da qansha júldege qol jetkiýdi kózdep otyrsyńdar» degen suraqtar keıde qarsha borap jatady. Osy týrnırge attanar aldynda da «qansha joldama alsyńdar» degen suraqtar kóp qoıyldy. Barlyǵyna buıyrǵany bolady. «Aryq aıtyp, semiz shyǵýǵa tyrysamyz» dep jaýap berdim. Mine, búgin bes joldama aldyq. Endi erler arasynda tek bir salmaqta joldama joq», - dedi bapker.

Aıta keteıik, bokstan Qazaqstan erler quramasynyń qorjynynda búginge deıin alty joldama bar. Olardy Sáken Bıbosynov (51 kg), Sabyrhan Mahmud (57 kg), Aslanbek Shymbergenov (71 kg),Nurbek Oralbaı (80 kg), Aıbek Oralbaı (92 kg) jáne Qamshybek Qońqabaev (+92 kg) jeńip aldy.