Bir top aqtóbelikke memlekettik nagradalar tabystaldy

<p>Aqtóbede Respýblıka kúnine arnalǵan saltanatty shara ótti. Onda bilim men densaýlyq saqtaý, mádenıet pen sport salasynda eńbek etip júrgen mamandar men kásipkerler memlekettik nagrada aldy, dep habarlaıdy <a href="Kazinform" target="_blank" rel="noopener">Kazinform</a>.</p>

Aqtóbe qalasynda búgin merekelik shara balabaqsha men mektepte, túrli shyǵarmashylyq uıymdarynda ótkizildi. Al aýqymdy kesh «Óner» ortalyǵynda ótti. Oǵan oblys, qala jáne aýdandardyń qurmetti azamattary, eńbek ardagerleri, máslıhat depýtattary, kásiporyn, mekeme, qoǵamdyq uıym basshylary, kásipkerler, jastar qatysty. Oblys ákimi Ashat Shaharov 30 jyldan astam ýaqytta óńirde atqarylǵan isterge toqtaldy.

- Aqtóbe oblysynyń turǵyndary Qazaqstannyń áleýmettik-ekonomıkalyq damýyna óz úlesin qosyp keledi. Sonyń arqasynda Aqtóbe jaıly, tartymdy, qolaıly óńirler qatarynda. 33 jylda oblysymyzda 400-ge jýyq bilim oshaǵy, 179 medıtsınalyq, 712 sporttyq nysan salynyp, halyq rahatyn kórip otyr. Bıyldyń ózinde ulttyq jobalar aıasynda óńirde 20 mektep, 15 densaýlyq saqtaý nysany salyna bastady. Jobalar 2025 jylǵa deıin iske qosylady. Táýelsizdikke qol jetkizgennen beri oblysta 13 mln 622 myń sharshy metr turǵyn úı salyndy. Jyl sanap qurylys jumystarynyń da qarqyny artyp keledi. Onyń ishinde áleýmettik salany damytýda, shaǵyn jáne orta bıznes salasyndaǵy jeke sektordyń úlesi basym. Óńirde jańa joldar salynyp, óndiris oryndary ashylyp jatyr. Kógildir otyn, sapaly aýyz sýmen qamtý baǵytynda júıeli jumystar atqarylýda,- dedi Aqtóbe oblysynyń ákimi Ashat Shaharov.

Memlekettik jáne qoǵamdyq qyzmettegi sińirgen eńbegi, eldiń áleýmettik-ekonomıkalyq jáne mádenı damýyna, halyqtar arasyndaǵy dostyq pen yntymaqtastyqty nyǵaıtýǵa qosqan eleýli úlesi úshin kásipker Zamzagúl Baımaǵambetova, Talǵat Salfıkov jáne munaı kompanııasynda keńesshi bolyp eńbek etetin Nıkolaı Baev «Parasat» ordenin taqty. Al «Qurmet» ordeni 8 aqtóbelikke berildi. Olardyń arasynda qarttyq shaǵynda jylyjaı sharýashylyǵyn damytyp, ony ózgege úıretip júrgen Baıǵanın aýdanynyń kásipkeri Qutym Qasenov bar. Zeınetker qazirgi kezde «Aýyl amanaty» jobasymen nesıe alǵan adamdarǵa kásip bastaý, ony damytý tetigin úıretin júr.

Foto: Aqtóbe oblysy ákiminiń baspasóz qyzmeti.

- Men ózim qurylysshymyn. Keıin qolóner sheberi bolyp, EKSPO kezinde 10 kún boıy qazaqtyń ulttyq mýzyka aspaptaryn jasaý sheberlik sabaǵyn ótkizdim. Qazirgi kezde jylyjaı baptaımyn, jastardy oqytamyn, úıretemin. Adamdar Atyraý, Mańǵystaý oblystarynan da keledi. Úıime kelgende bar qyr-syryn kórsettim. Jasym seksenge kelse de jumys istegen durys dep oılaımyn. Bári eńbektiń arqasy, eńbek etý kerek,- dedi Qutym Qasenov.

Sonymen birge «Eren eńbegi úshin» medalin 18 adam aldy. Olardyń arasynda energetıka, turǵyn úı-kommýnaldyq sharýashylyq salasynyń mamandary men muǵalim, dárigerler bar. Eki órt sóndirýshi «Erligi úshin», «Jaýyngerlik erligi úshin» medalderimen marapattaldy.

- Bala kúnnen osy qyzmetti armandaǵan edim. Ózim 25 jasymda osy salaǵa kelip, jumysymdy bastadym. Órt sóndirýshiniń boıynan bar qasıet tabylýy kerek. Ásirese tabandylyq, batyrlyq qajet. Ár shaqyrtýdyń óz qıyndyǵy, jaýapkershiligi bar. Shynymdy aıtsam, ár órt sóndirýshi, ár qutqarýshy – búginginiń batyry,- dedi Qarǵaly aýdany órt sóndirý bólimi bastyǵynyń orynbasary Rýslan Ámirov.

Ol bıyl qańtarda Qarǵaly aýdany Badamsha aýyly Patsaev kóshesindegi úılerdiń birinen 7 adamdy evakýatsııalady. Órttiń taralýyna jol bermeı, tez sóndirdi. Al naýryzda oblystyq mańyzy bar Dóń-Badamsha-Aqtóbe-Orsk avtojolynda qar qursaýynda qalǵan adamdarǵa psıhologııalyq kómek kórsetti. Onyń kásibı sheberliginiń arqasynda 4 adam qutqarylyp, 8 adam evakýatsııalandy. Keıin eldi mekenge aman-esen jetkizildi.

Aıtyp óteıik, Respýblıka kúni jalpy Aqtóbede 40 adam túrli memlekettik nagradalarǵa ıe boldy.

Foto: Aqtóbe oblysy ákiminiń baspasóz qyzmeti.