Bir táýlikte 11 jylqyny poıyz basyp ketti

<p>ASTANA. KAZINFORM — Jetisý oblysynda júk poıyzy 8 jylqyny qaǵyp ketti, dep habarlaıdy Polisia.kz. </p>

Osy jyldyń 8 aıynda kóliktegi polıtsııa departamentinde poıyzdardyń shuǵyl tejelýiniń 1 417 deregi tirkeldi. 

Elimizdiń temir joldarynda 1070 janýardy qaǵyp ketý faktisi boldy, onyń ishinde 355 bas jylqy, 191 bas iri qara, 28 usaq mal bar.  

Kóliktegi polıtsııa departamentiniń bastyǵy Baqytjan Malybaevtyń aıtýynsha, osy jylǵy 31 tamyzda Jetisý oblysynyń Byjy — Bahsha aralyǵynda júk poıyzynyń mashınısi temir joldan jylqy malyn kórip, tejegishti shuǵyl tejedi. 

Alaıda qaqtyǵystyń aldyn alý múmkin bolmady, saldarynan 8 bas jylqy poıyz astyna tústi. Josparlanbaǵan poıyz toqtaýy 14 mınýtty qurady. 

Dál sol kúni Saryózek — Úshtóbe aralyǵynda da osyndaı jaǵdaı qaıtalandy, onda júk poıyzy 3 bas jylqyny qaǵyp ketti. 

Tekserý barysynda Úshtóbe stantsııasyndaǵy jelilik polıtsııa bóliminiń qyzmetkerleri úı janýarlarynyń ıelerin taýyp, olardy temirjoldyń bólingen jolaǵynda mal jaıý erejelerin buzǵany úshin ákimshilik jaýapkershilikke tartty.

Olar Jetisý oblysynyń 44 jáne 55 jastaǵy turǵyndary bolyp shyqty.

B. Malybaev kólik polıtseıleri únemi reıdter júrgizip, mal ıelerimen áńgimeler ótkizip, jadynamalar taratyp, aýylsharýashylyq janýarlarynyń ıelerin muqııat bolýǵa shaqyratynyn aıtty.

Udaıy júrgiziletin profılaktıkalyq jumystarǵa qaramastan, turǵyndar tarapynan quqyq buzýshylyqtarǵa áli de jol berilýde.

— Temirjol arqyly ótý tek ótkelderde, jol ótpelerinde jáne arnaıy belgilengen oryndarda ǵana ruqsat etilgenin taǵy da eske salamyz. Degenmen qarańǵy, tumandy, nóser jańbyr jáne borandy kúnderi, tipti ol jerlerden de ótýge tyıym salynady, — deıdi B. Malybaev.