Bir sátsizdikke bola, qazaq boksyn kúresinge laqtyrýǵa bolmaıdy – Ádilbek Nııazymbetov

<p>PARIJ. KAZINFORM &ndash; Frantsııa astanasy Parıj qalasynda ótip jatqan Olımpıada oıyndarynda qazaq boksshylarynan erler arasynda tek bir sportshy fınalǵa shyqty.</p>

Qalǵan boksshylarymyz jarysty erte aıaqtap, kórermender qataryna qosyldy. Osy oraıda, bokstan eki dúrkin Olımpıada oıyndarynyń kúmis júldegeri Ádilbek Nııazymbetovpen az-kem suhbattasqan edik. 

- Ádilbek, siz qatarynan eki Olımpıadaǵa baryp, ekeýinde de kúmis júlde jeńip alyp keldińiz. Olımpıada júldegeri retinde Parıjda judyryqtasyp jatqan boksshylarymyzdan Nurbek Oralbaıdan basqasynyń jarysty erte aıaqtaýyna ne sebep boldy dep esepteısiz?

- Parıjge barǵan jigitterimiz Olımpıadaǵa óte joǵary deńgeıde daıyndalyp bardy dep oılaımyn. Bapkerler de myqty, tájirıbeli mamandar. Qaı-qaısyn alyp qarsaq ta óz salmaqtarynyń úzdigi edi. Álem, Azııa oıyndarynda elge júlde syılap júrgen boksshylar. Biraq, Parıjde jigitterdiń baby shapqanymen, baǵy shappady dep oılaımyn.

- Jigitterimiz birinen keıin biri alǵashqy aınalymnan ary aspaı, jarysty aıaqtaýyna tóreshiler kináli me?

- Óz basym tóreshiler jaǵynan bura tartýshylyq boldy dep esepteımin. Jarysty bastan-aıaq qarap otyrmyz. Jigitterdiń qaı-qaısy da jaqsy óner kórsetti. Tipti, utyldy degenniń ózinde, teń dárejede judyryqtasyp jatty. Qarsylastarynyń da eshqandaı artyqshylyqtaryn baıqamadym. Jigitterimiz bar kúsh-jigerin saldy. Boksshylarymyz Parıj Olımpıadasyna jeńileıin, qydyryp qaıtaıyn dep barǵan joq .

Endi fınalda Nurbek Oralbaı judyryqtasady. Oralbaıǵa taqymymyzdy qysyp, jankúıer bolyp, jeńis tileımiz.

- Qazir áleýmettik jelide «Qazaq boksy toqyrady», «Bapkerlerdi aýystyrý kerek», «Ulttyq quramadan anaý ketý kerek, mynaý ketý kerek» degen sııaqty áńgimeler jeldeı esip jatyr. Siz buǵan ne aıtar edińiz...

- Qalaı bolmasyn, qazaq boksshylaryn olaı kókten alyp, jerge salýǵa bolmaıdy. Osyǵan deıin talaı Olımpıada oıyndarynda qanshama altyn júldelerimen eldi aıdaı álemge pash etti. Eshqandaı oıyndardan júldesiz qalyp kórgen joq. Tokıoda ǵana altynsyz qalǵanymyz bolmasa, ózge oıyndarda qashan altynsyz kelip edi. Mine, buıyrsa Nurbek Oralbaı da altyn alyp kelýi ábden múmkin. Sondyqtan, osyndaı bir sátsizdikterdi alasapyran dúnıege aınaldyryp, qazaq boksyn kúresinge laqtyra salýǵa bolmaıdy.