Bir kúnde Astanadan júk kóligimen 600-den asa reıs qar shyǵaryldy

<p>ASTANA. KAZINFORM &mdash; Elordanyń kommýnaldyq qyzmetteri táýlik boıy aýysymdyq rejımde jumys isteıdi. Bir kúnde olar qaladan 7,7 myń tekshe metrden asa qar shyǵardy, dep habarlaıdy Astana ákimdiginiń baspasóz qyzmeti.</p>

2 jeltoqsannan 3 jeltoqsanǵa qaraǵan túni kóshelerdi qar men muzdan tazartýǵa 388 arnaıy tehnıka, 181 jol jumysshysy shyqty.

2 jeltoqsandaǵy kúndizgi aýysymda qar polıgondaryna aýyr júk kólikpen 622 reıs, 7,7 myń tekshe metrge jýyq qar shyǵaryldy.

Qys mezgiliniń basynan beri qaladan 64 myńǵa jýyq reıs arqyly 810 myń tekshe metr qar shyǵaryldy.

Erejege sáıkes, eń aldymen, qalada keptelis bolmas úshin óte qarqyndy qozǵalys ýchaskeleri tazalanady. Sondaı-aq, ortasha qarqyndylyǵy bar ýchaskeler-alańdar, vokzal mańy aýmaqtary, trotýarlar, áleýmettik nysandarǵa kirme joldar jáne t. b. oryndar qardan tazartylady.

Ortalyq kóshelerde, jolaýshylar kóligi marshrýttarynda, aıaldamalar men trotýarlarda tazalaý basymdyqqa ıe.

Elordada birneshe jabdyqtalǵan qar polıgony jumys isteıdi. Olar samosval tehnıkasynyń nómirlik belgilerin oqý júıesimen jabdyqtalǵan, munda beınebaqylaý kameralary ornatylǵan, jaryqtandyrý qosylǵan.

— Elorda turǵyndary men qonaqtarynan joldarda abaı bolýdy, qaýipsizdik erejelerin saqtaýdy, daýyldy eskertý bolǵan jaǵdaıda alys saparlardan bas tartýdy suraıdy. Tótenshe jaǵdaı týyndaǵan kezde «112» telefonyna habarlasyńyz, — delingen habarlamada.

Buǵan deıin habarlaǵanymyzdaı, Astana qalasynyń «Úrker» turǵyn alabynda gaz taratý jelileriniń qurylysy aıaqtaldy.