Bir-birimizdi izdep turamyz: Atyraý polıtsııasynda úsh birdeı egiz eńbek etip júr
Máselen, Atyraý qalasynda turatyn Ámir men Damır Bısenbaıuly kópbalaly otbasynda tárbıelengen.
Anasy Álııa Ádııatqyzynyń aıtýynsha, egizder bala kezinen polıtsııa bolýdy maqsat etken.
«Bizdiń otbasymyzda 5 bala bar. Egiz uldarym bir-birin izdep turady. Bul — olardyń basty ereksheligi», -deıdi Álııa Ádııatqyzy.
Ámir men Damır orta mektepti bitirgen soń áskerge qataryna attanǵan. Áskerden oralysymen ishki ister organyna jumysqa ornalasqan.
Qazir oblystyq polıtsııa departamentinde aıdaýyl qyzmeti vzvodynyń arnaıy tobynda jumys isteıdi. Ekeýiniń de sheni — polıtsııa serjanty.
Al Oljas pen Jalǵas Sydıqovtar eńbek jolyn Qurmanǵazy aýdandyq polıtsııa bóliminde bastaǵan. Bir qyzyǵy, ekeýi de polıtsııa kapıtany shenin bir mezgilde alǵan.
«Aýyldastarymyz bala kezimizde bizdi atymyzdy shatastyryp, Oljas, Jalǵas dep qatar shaqyratyn edi. Qazir kıgen kıimimiz birdeı bolsa, aıyra almaıtyndar bar. Keıde áriptesterimiz de shatastyrady. Polıtsııa bólimine shaǵym aıta kelgen turǵyndar arasynda da ekeýmizdi aıyra almaıtyndar kezdesti», -deıdi egiz jigitter.
Oljas pen Jalǵas mektepti 2014 jyly bitirgen. Sol jyly Іshki ister mınıstrliginiń M.Esbolatov atyndaǵy Almaty akademııasyna oqýǵa túsken.
Akademııany úzdik bitirip, Qurmanǵazy aýdandyq polıtsııa bólimine jumysqa ornalasqan.
«Otbasynda aǵanyń qamqorlyǵyn kórdik. Qaryndasqa aǵa boldyq. Óıtkeni, biz — otbasyndaǵy ortanshy balamyz», -deıdi Oljas Sydıqov.
Qazir ol oblystyq polıtsııa departamenti ekstremızmge qarsy is-qımyl basqarmasynyń jedel ýákili bolyp jumys istep júr.
Al, Jalǵas — Qurmanǵazy aýdandyq polıtsııa bólimi ekstremızmge qarsy is-qımyl tobynyń aǵa jedel ýákili.
Ekeýi de úılengen, Oljastyń eki, Jalǵastyń bir qyzy bar.
«Qazir jumys babymen men Atyraý qalasynda, syńarym Jalǵas Qurmanǵazy aýdanynda turady. Biraq, biz bir-birimizdi kún saıyn izdep, sóılesip turamyz. Bir-birimizge kómek berýge daıynbyz. Óıtkeni, biz — egizbiz», -deıdi Oljas Sydıqov.
Taǵy bir egiz jup Isataı aýdanynda turady. Olar — Dýlat pen Damır Nurmuhanbetovter.
Dýlat — Isataı aýdandyq polıtsııa bóliminde krımınaldyq polıtsııa bólimshesiniń jedel ýákili, al, Dýman tergeý bólimshesiniń tergeýshisi qyzmetin atqaryp júr.
«Polıtsııa qyzmetkeri bolý — eń jaýapty mamandyq. Sebebi, tártip saqshysy únemi qoǵam múddesi, tártip pen tynyshtyq úshin qyzmet atqarady. Halyq kún saıyn qaýipsizdigi men tynyshtyǵyna senimdi bolýy kerek. Eldiń tynyshtyǵy men qaýipsizdigi jaýapty salany tańdaǵanymyzǵa ókinbeımiz. Bir salada jumys isteýdiń artyqshylyǵy bar. Biz bir-birimizdi izdep, kómektesýge daıyn turamyz», -deıdi Dýlat pen Dýman.