Brakonerlerden bir aıda 300-den asa keli bekire tárkilendi - Atyraý
Atyraý oblystyq polıtsııa departamentiniń baspasóz qyzmetinen málim etkendeı, 20 qazan-19 qarasha aralyǵynda «Brakoner» jedel-profılaktıkalyq is-sharasy ótkizilgen.
«Bul is-sharanyń maqsaty – tabıǵatty qorǵaý zańnamasyn buzýshylyqtardy, bıologııalyq resýrstar túrleriniń zańsyz aınalymyn anyqtaý. Іs-shara kezinde 111 quqyq buzýshylyq tirkeldi. Onyń ishinde aýlaý qaǵıdalaryn buzýǵa baılanysty 18, zańsyz balyq aýlaýǵa qatysty 51 derek bar. Qarýdy zańsyz ıelený, berý, ótkizý, saqtaý, alyp júrý, tasymaldaý talabyn buzǵan 7, azamattyq, qyzmettik, marapattyq kollektsııalyq qarý men patrondaryn ıelený, berý, esepke alý, saqtaý, paıdalaný, tasymaldaý, el aýmaǵyna ákelý, áketý jáne tranzıtpen ótkizý tártibin buzýdyń 27 deregi anyqtaldy», -dep habarlady departamenttiń baspasóz qyzmeti.
Sondaı aq, balyq resýstaryn zańsyz aýlaýǵa qatysty 3, ósimdikterdiń nemese janýarlardyń sırek kezdesetin jáne quryp ketý qaýpi tóngen túrlerimen zańsyz aınalysý deregi boıynsha 5 qylmystyq is tirkelgen.
«Zańsyz balyq aýlaýshylardan 372,9 keli balyq tárkilendi. Onyń ishinde 313,5 keli bekire tuqymdas balyq túrleri bar. Quqyq buzýshylardan 40 balyq aýlaý quraldary, 7 tirkelmegen tegis uńǵyly ańshylyq qarý men 1 sý kóligi alyndy», -dep málim etti departamenttiń baspasóz qyzmetinen.
Eske sala ketelik, budan buryn «Bekire – 2024»: aktsııasy kezinde Atyraýda ustalǵan júrgizýshiniń kóliginen 70 keli bekire tárkilengenin habarlaǵan bolatynbyz.