Bir aptada 931 shetel azamaty elden shyǵaryldy
«Aldymen eldegi krımınogendik jaǵdaıǵa toqtalaıyq. Bir apta ishinde 2893 qylmys jasaldy, onyń 1800-i táýlik ishinde ashyldy. Polıtsııa qyzmetkerleri «izin sýytpaı» 8 kisi óltirýdi, 9 ólimge ákep soqqan densaýlyqqa qasaqana aýyr zııan keltirýdi, 1 qaraqshylyq, 31 tonaý jáne 368 bóten múlikti urlaý qylmystaryn ashty», - dedi mınıstrliktiń ókili Shuǵyla Turlybek baspasóz máslıhatynda.
Sondaı-aq, 2-8 qazan aralyǵynda el aýmaǵynda «Zańsyz kelýshi» jedel-profılaktıkalyq is-sharasy ótken.
«Sharanyń maqsaty - zańsyz kóshi-qon arnalaryn anyqtaý jáne onyń jolyn kesý. Operatsııa barysynda kóshi-qon zańnamasyn buzǵan 8303 sheteldik, sonymen qatar sheteldikterdiń elde bolý erejesin durys qamtamasyz etpegen 2632 adam men sheteldik jumys kúshin tartý erejelerin buzǵan 537 adam jaýapkershilikke tartyldy. Elden 931 sheteldik azamat shyǵaryldy. Táýelsiz memleketter dostastyǵy elderinen kelgen sheteldikter arasynan 22 qylmysker ustaldy», - deıdi ol.