Bir adam jansaqtaý bóliminde – dárigerler Qarqaralydaǵy órtten zardap shekkenderdiń jaǵdaıyn aıtty

<p>QARAǴANDY. KAZINFORM &ndash; Qaraǵandy oblysynyń Densaýlyq saqtaý basqarmasy Qarqaraly aýdanyndaǵy dala órti kezinde zardap shekkenderdiń jaǵdaıy týraly habarlady. Dárigerlerdiń aıtýynsha, bir adam reanımatsııada, tórt adamnyń jaǵdaıy turaqty, dep habarlaıdy Kazinform agenttiginiń tilshisi.</p>

«Qarqaraly aýdanynyń Sheptikól aýylynda dala órtin sóndirý barysynda 5 adam zardap shekti. Tórt patsıenttiń jaǵdaıy turaqty dep baǵalanady. Besinshi naýqastyń jaǵdaıy aýyr (kúıik 35% denesin shalǵan) jáne ol reanımatsııada. Barlyq zardap shekkenderge statsıonarda qajetti medıtsınalyq kómek kórsetilýde», — dep málimdedi H. J. Maqajanov atyndaǵy kópsalaly aýrýhananyń travmatologııa ortalyǵynyń basshysy Berik Tóleýbaev. 

Anyqtalǵandaı, jan saqtaý bóliminde jatqan naýqas jergilikti turǵyn jáne erikti órt sóndirý bóliminiń múshesi bolyp shyqty. 

«Qurmetti turǵyndar, saǵat 11.00-degi jaǵdaı boıynsha baıandaımyn. Órtpen kúresý úshin 562 adam jáne 81 birlik tehnıka jumyldyryldy. Qutqarýshylar tamaqpen, sýmen, tehnıkaǵa qajetti JJM tolyq kólemde qamtamasyz etilgen. Sondaı-aq, aýdannyń azyq-túlik dúkenderinde qajettiniń bári bar — azyq-túlik, sý jáne t. b. Órt 35 myń gektar aýmaqqa tarady, biraq eń bastysy eldi mekenderden alshaq jerlerde», — dedi Qarqaraly aýdanynyń ákimi Ádiljan Arǵynov. 

Sondaı-aq, ol mal qyrylýy týraly aqparat túspegenin jáne olar barlyq fermerlermen únemi baılanysta ekenin atap ótti. 

«Barlyq turǵyndardan jalǵan aqparat taratpaýyn suraımyn. Aýdan ákimdiginde 8 72146 31 3 66 jedel jelisi jumys isteıdi, barlyq suraqtardy osy telefon arqyly naqtylaýǵa bolady. Qutqarýshylar táýlik boıy jumys istep jatyr, órtti joıý boıynsha barlyq sharalar qabyldaýda», — dedi aýdan ákimi.

Esterińizge sala keteıik, 6 qazanda Qarqaraly aýdanynda dala órti bastaldy. Órtti sóndirý kezinde 24-ÓSB azamattyq qorǵaý serjanty Halı Haırat qaza tapty. 

Osyǵan deıin Baıanaýylda órt shalǵan jerlerdiń aýmaǵy 10 myń gektarǵa jetkennin jazdyq. 

Aıta keteıik, Tótenshe jaǵdaılar mınıstrliginiń baspasóz qyzmeti Qaraǵandy oblysynda tutanǵan dala órtine baılanysty tyń málimetterdi jarııalady.  

Al Qarqaraly aýdanynyń ákimi Ádiljan Arǵynov qazir áleýmettik jelilerde túrli kómek uıymdastyryp jatqandar týraly eskertti.