Bozjyradaǵy jabaıy týrızmdi jónge salmasaq, tabıǵattyń túbine jetemiz – ekolog

NUR-SULTAN. QazAqparat - Ekologııa salasynyń belgili mamany Orynbasar Toǵjanov 18 jyl boıy Mańǵystaý ólkesiniń ekologııalyq jaǵdaıyn jaqsartý, sondaı-aq ekotýrızmdi uıymdastyrý máselesimen turaqty aınalysyp keledi. Óńirge qarasty Beıneý jáne Qaraqııa aýdandarynyń qurmetti azamaty biraz ýaqyttan beri Bozjyra ańǵarynda jabaıy týrızm beleń alyp, rettelmegen kólik aǵyny janýarlardyń tynyshyn buzyp jatqanyna alańdaýshylyq bildirip júr. Osyǵan oraı ekolog-mamannyń atalǵan aýmaqtaǵy jaǵdaıdy retteý joldaryna qatysty pikiri men usynystaryn bilgen edik, dep habarlaıdy QazAqparat tilshisi.

«Bozjyraǵa kelýshiler sany jyl saıyn eselep artýda. Alaıda qarajat tapshylyǵynan týrıstik qyzmetti talapqa saı uıymdastyrýǵa múmkindik bolmaı, Bozjyra ańǵaryna Ústirt shyńynyń ústi jáne asty arqyly andyzdap keletin ondaǵan borpyldaq dala joldary paıda boldy. Olarmen birneshe avtokólik ár jolmen qaptaldasa, andaǵaılaı júıtkigen kezdegi alapat aq tozańdy kórgende janyńyz túrshigedi. Al adamnyń qysastyǵynan jóńkile qashqan arqar, qaraquıryq syndy ańdardyń kórinisi júrek syzdatady. «Jabaıy týrızmdi» tártipke salyp, «ekologııalyq týrızmge» aınaldyrmasa, andyzdaǵan jol, andaǵaılaǵan avtokólik aǵyny jandy jáne jansyz tabıǵattyń túbine jetetini anyq»,- deıdi ol.

Sarapshy maman ınvestor kompanııalardy alys-jaqynnan kelgen týrısterdi qabyldaıtyn bir qabatty qonaqúıdi Bozjyra naızashyńdary túbinen salý jónindegi usynysyna qarsy bolyp, óz ýájin jınalystarda bildirgen.

«Sonymen qatar birqatar azamattar usynǵandaı, týrıstik qabyldaý ornyn 10-50 shaqyrym qashyqtan salýdyń tıimsizdigine de kóz jetkizdik. Sebebi alystaǵy týrıstik qabyldaý ornynda turyp, san-sapat dala jolymen týrısterdiń qandaı kólikpen, qaı jaqtan kelgenin, qalaı júrgenin, ne jasap jatqanyn, osyndaıózge de áreketterin baqylaý, retteý múmkin bolmaıtynyn túsindik. Sondyqtan shaǵyn qonaq úıi, vızıt-ortalyǵy bar týrıstik nysandar birneshe shaqyrymdaǵy ańǵar men naızashyńdar túgel kórinetin tóbe ústinde ornalasýy qajet. Onda mádenı týrızmdi uıymdastyrý úshin mindetti túrde qonaq úı, avtoturaq, kelýshilerdiń túrli qajetterin óteıtin oryndar, paıdalanatyn at, túıe, basqa da «ekokólikter» men áýe sharlaryn saqtaıtyn jáne qyzmetshiler men gıdterge ystyq-sýyqta panalaıtyn baspana bolýy kerek. Eger mundaı oryn tym qashyqta bolsa, Aqtaýdan eki-úsh saǵatta jetip baratyn tep-tegis jolda kópshilik oǵan toqtamaı-aq, birden Bozjyraǵa tartatyny sózsiz»,- deıdi O.Toǵjanov.

Jol máselesin aıta kele maman Bozjyra aýmaǵynda avtoqozǵalysqa shekteý qoıý qajettigin de túsindirdi.

«Beket ataǵa 15 shaqyrymdaı jetpeı «Ata jolynan» burylyp shyń ústindegi Bozjyra panoramalyq alańqaıyna baratyn, uzyndyǵy nebári 10 shaqyrym jolǵa qatqyl taban tósep, bıiktegi basqa avtoqozǵalysqa múldem tyıym salý kerek. Bozjyra alqabyn tolyq baqylaýda ustap, onyń ekologııalyq jáne rekreatsııalyq syıymdylyǵyn eskere otyryp, týrısterdi arnaýly soqpaqpen jaıaý nemese at, túıe, velosıped, ózge de «ekologııalyq taza» kólikpen qozǵalýǵa, áýe sharymen kóterilýge, bıik munaralarǵa shyǵýǵa ǵana ruqsat berýge bolady», - dedi maman.

O.Toǵjanovtyń pikirinshe, jaıylymy mol Bozjyra shatqaldarynyń jaqyn qolaıly jerinen ań ishetin sý kózin jasasa, týrıster Beket ata basyndaǵydaı adamǵa úırengen ańdardy da tamashalaı alady.