Bozjyrada qonaqúı salýǵa qatysty mınıstrdiń jaýaby: Qorshaǵan ortaǵa áseri de baǵalanady

NUR-SULTAN. QazAqparat – Ortalyq kommýnıkatsııalar qyzmetinde ótken brıfıngide QR Ekologııa, geologııa jáne tabıǵı resýrstar mınıstri Serikqalı Brekeshev Bozjyra shatqalynda qonaqúı salý jobasy týraly pikir bildirdi, dep habarlaıdy QazAqparat tilshisi.

«Bozjyra shatqalynda qonaq úı salý máselesiniń ózine kelsek, ol jerde barsha zamanaýı talaptarǵa, sonyń ishinde ekologııal talaptaryna saı nysan salynýy kerek. Sondyqtan bul jerde eshqandaı keri sıpat joq dep oılaımyn. Óıtkeni qonaqúı respýblıka turǵyndary úshin, Mańǵystaý oblysynyń turǵyndary úshin de salynady. Nysan qurylysynyń kerisinshe mýltıplıkatıvti áseri kúshti bolady. Týrzım damıdy, jańa jumys oryndary ashylady. Meniń jeke pikirim boıynsha, ondaı qurylystyń qajettiligi bar bolý kerek. Respýblıkada týrızmdi damytý túsýdiń keleshegi bar deýge bolady», - degen mınıstr nysandy Bozjyra shatqalynan 5 shaqyrym jerde emes, 20-25 shaqyrym qashyqta salý kerektigi týraly sarapshylardyń paıymyna qatysty pikir bildirdi.

«Nysan men shatqaldyń arasyndaǵy qashyqtyq týraly mynany aıta alamyn. Ázirge jobalaý-smeta qujattamasy ázirlenip jatyr. Qorshaǵan ortaǵa áseri de baǵalanady. Jalpy ekologııa saraptamasyn alǵannan keıin bul suraqqa jaýap berýge bolady», - dedi Serikqalı Brekeshev.