Bozymbaev jyl sońyna deıin Qashaǵanda qansha munaı óndiriletinin jarııalady

ASTANA. QazAqparat - Jyl sońyna deıin Qashaǵanda bir mln. tonna munaı óndiriledi. Bul týraly búgin Parlament Senatynda tilshilerge bergen suhbatynda QR Energetıka mınıstri Qanat Bozymbaev málim etti, dep habarlaıdy QazAqparat.

«Qashaǵandy iske qosý 23 qazanǵa josparlanǵan edi. Alaıda, ken ornynan alǵashqy eksporttyq munaı qazannyń birinshi jartysynda jiberile bastady. Árıne, qazirgi kezde retke keltirý jumystary atqarylýda. Jalpy, munaı turaqty túrde qubyr júıesine baǵyttalyp jatyr. Tehnıkalyq kemshilikter bar, ıaǵnı bundaı jaǵdaılar osyndaı iri ken oryndary iske qosylǵan kezde bolatyny túsinikti. Degenmen, úlken problemalardy baıqap otyrǵanymyz joq»,-Bozymbaev.

Mınıstrdiń sózine qaraǵanda, qazirgi kezde Qashaǵanda 120 myń tonnadan astam munaı óndirilgen. Sonymen qatar gaz da «QazTransGaz» qubyrlaryna jiberildi. «QazTransOıl» AQ jáne Kaspıılik qubyr konsortsıýmy (KQK) arqyly eksporttyq operatsııalar iske asyrylýda.

«Jyldyń sońyna deıin tek Qashaǵannan eń az degende ortasha eseppen 500 myń tonna, al eger retke keltirý jumystary oıdaǵydaı bolsa, onda 1 mln. tonna munaı óndirý josparda bar. Jalpy, birinshi kezeńde bul jaqsy kórsetkish bolyp sanalady»,-dedi ol.

Esterińizge sala keteıik, 14 qazanda Energetıka mınıstrligi Qashaǵannan alǵashqy munaı partııasy eksportqa jiberilgenin habarlaǵan bolatyn. Sol kezde Kaspıılik qubyr konsortsıýmy (KQK) iske qosý-baptaý sheńberinde júrgizilgen jumystar kezinde Qashaǵan ken ornynan shamamen 7 700 tonna eksportqa shyǵarylatyn munaıdyń birinshi partııasy jóneltilgeni aıtyldy. Sonymen qatar «QazTransOıl» AQ qubyrlyq júıesine 18 800 tonna eksportqa shyǵarylatyn munaıdyń partııasy jóneltildi, al «Intergaz Tsentralnaıa Azııa» AQ magıstraldi júıesine 22,8 mln tekshe metr taýarlyq gaz berildi.

2016 jyldyń 28 qyrkúıeginde Soltústik Kaspıı konsortsıýmy teńizdegi jáne jerústi keshenindegi jabdyqtardy testileý jáne iske qosý-baptaý jumystaryna kiristi.

«A» aralynyń birneshe uńǵymalary ashyldy. Teńiz kesheni jabdyǵynyń jumysyn turaqtandyrǵan soń, munaı jáne gaz «Bolashaq» zaýytyna kelip tústi.

Qazirgi ýaqytta teńizdegi jáne jerústi keshenindegi jabdyqtardy iske qosý-baptaý, baqylaý-ólsheý aspaptaryn jáne tehnologııalyq protsesterdi basqarýdyń avtomatty júıelerin testileý jalǵastyrylýda. Turaqty jumys rejımine shyǵý birshama ýaqytty qajet etedi.