Bozymbaev Qazaqstanda jyl basynan beri ýtılızatsııaǵa qansha kólik tapsyrylǵanyn atady

ASTANA. QazAqparat - Jyl basynan beri Qazaqstanda 26 myń eski kólik tapsyrylyp, olardyń basym bóligi Qaraǵandydaǵy kólikterdi ýtılızatsııalaý zaýytyna jóneltilgen.

Bul týraly QR Energetıka mınıstri Qanat Bozymbaev qorshaǵan ortany qorǵaý taqyryby boıynsha azamattyq sektordyń ókilderimen ótken kezdesýde málim etti.

«Qazirgi ýaqytta el ishinde eski kólikterdi ótkizýge yntalandyrý baǵdarlamasyna kópshilik mańyz berip keledi. Eski kólikterdi ótkizý protsesi bastalǵaly beri 4,7 mlrd teńgeniń 32 myń avtokóligi qabyldanǵan. Naqtyraq aıtqanda, eski kólikterdiń 5665 myńy (846,138 mln teńge) byltyrǵy jyly tapsyrylǵan edi. 2017 jyly quny 5,1 mlrd teńgelik 34 myń eski kólikti satyp alý josparlanǵan bolatyn. Búgingi kúnge deıingi kórsetkishti saralaı otyryp, jyl basynan beri quny 3,9 mlrd teńgeniń 26 myń eski kóligi ótkizilgenin anyqtap otyrmyz», - deıdi Energetıka mınıstri.

Onyń aıtýynsha, eski avtokólikterdi ótkizip, ol úshin aqsha alý úrdisi el ishinde oń baǵasyn alǵan. Sonymen qatar, atalǵan baǵdarlama otandyq avtokólikterdiń jańartylýyna da septigin tıgizip jatyr.

«Jınalǵan eski avtokólikter Qaraǵandyǵa jóneltilip, ary qaraı ýtılızatsııaǵa ketedi. Qaraǵandyda avtokólikterdi ýtılızatsııalaý boıynsha zaýyttyń 1-shi bóligi jumys istep tur. Zaýyttyń ekinshi bóligin osy jyldyń jeltoqsan aıynda iske qosý josparymyzda bar. Demek, ol jylyna 50 myń avtokólikti ýtılızatsııaǵa jibere alady», - deıdi Qanat Bozymbaev.