Bozymbaev «Gazprom» basshysymen Qazaqstandaǵy gaz jelisin tartý jobalaryn talqylady

ASTANA. QazAqparat - Sankt-Peterbýrg qalasynda QR Energetıka mınıstri Qanat Bozymbaev Reseıdiń «Gazprom» AAQ Basqarma tóraǵasy Alekseı Mıllermen kezdesti, dep habarlaıdy QazAqparat QR Energetıka mınıstrliginiń baspasóz qyzmetine silteme jasap.

«Kezdesýde Astanany gazdandyrý jobasynyń iske asyrýǵa qolaıly bolatyn baǵyttary talqylandy. Talqylaý barysynda birlesken jumys tobyn qurý sheshimi qabyldandy, jumys tobyna qysqa merzimde Astanany jáne Ortalyq Qazaqstandy gazdandyrý úshin Reseıden Qazaqstanǵa tartylatyn tranzıttik magıstraldi gaz qubyryn salýǵa múmkindik beretin baǵyttardy ázirleý tapsyryldy», - delingen habarlamada.

Osy oraıda, tranzıttik magıstraldi gaz qubyryn salý jobasyn sátti iske asyrý gaz salasyndaǵy ekijaqty yntymaqtastyqty budan ári damytýǵa múmkindik beretindigin atap ótý mańyzdy.

Sondaı-aq taraptar Kaspıı teńizindegi jáne shekaralas ken oryndaryndaǵy jer qoınaýyn paıdalaný jobalaryn iske asyrý máseleleri boıynsha aǵymdaǵy jaǵdaıdy talqylady.

Jalpy aıtqanda taraptar gaz salasyndaǵy ekijaqty yntymaqtastyq qanaǵattanarlyq ekendigin atap ótti.

Q. Bozymbaev qazaqstandyq taraptyń birlesken jobalardaǵy uzaqmerzimdi áriptestik qatynastardy nyǵaıtý jáne keńeıtýdi qoldaıtyndyǵyn atap ótti, sondaı-aq gaz salasyndaǵy eki eldiń yntymaqtastyq potentsıalyn budan ári tıimdirek damytýǵa nıettiligin bildirdi.  

Eske sala ketsek, 2016 jyly Qazaqstan men Reseı arasyndaǵy XIII óńiraralyq yntymaqtastyq forýmy aıasynda eki eldiń Memleket basshylary 2016-2018 jyldarǵa arnalǵan birlesken is-qımyl josparyna qol qoıǵan bolatyn.