Bozymbaev: Aqtóbe oblysynda gazdyń qaıda ketkenin tekserý kerek
«Keshe buqaralyq aqparat quraldarynda Aqtóbe oblysynda suıytylǵan gazdyń tapshylyǵy máselesi boıynsha málimetter jarııalandy. Gaz quıý stansalarynda úlken kezekter baıqalýda»,-dep toqtalǵan Úkimet basshysy selektorlyq baılanys arqyly Aqtóbe oblysynyń ákimi Berdibek Saparbaevtan qazirgi jaǵdaıdy surady.
Óz kezeginde óńir ákimi gaz máselesi turǵysynda sońǵy eki kúnde tıisti sharalar atqarylyp jatqandyǵyn, keshe qosymsha kólemde gaz alynǵanyn atap ótti. Sonymen qatar ol ekinshi másele gaz satatyn mekemelerdiń keıbireýleriniń jumysyna baılanysty ekenin jetkizdi.
«Keshe prokýratýraǵa, bıýroǵa tıisti tekserýler jasaý boıynsha júgindik. Qazirgi kezde qajetti sharalar qoldanylyp jatyr. Bizdiń oıymyzsha, búginnen bastap gaz boıynsha problema bolmaýy kerek»,-dedi B. Saparbaev.
Budan bólek, QR Energetıka mınıstri Qanat Bozymbaev Aqtóbe oblysynda gazben qamtamasyz etý baǵytynda tirkelgen tórt kompanııa bar ekenin aıtty.
«Aı saıyn mınıstrlik atalǵan oblysqa 5 200 tonna suıytylǵan gaz bóledi. Jalpy, júz paıyzyn osy tórt kompanııa alyp ketedi jáne oblysta satady. Naýryz aıynda da bes myń tonnadan astam gazdy olar satyp aldy. Biraq bul gaz qaıda jiberilgenin tekserý kerek. Sondyqtan búgin eki laýazymdy qyzmetkerdi Aqtóbe oblysyna jiberdim»,-dedi Q. Bozymbaev.
Osy oraıda Premer-Mınıstr Baqytjan Saǵyntaev bul másele jyl saıyn týyndaıtynyn aıta kele: «Gaz nemese benzın tapshylyǵy baıqalady. Kimniń qaı kólemde, qaı jerge jiberiletinin jaqsy bilemiz. Qanat Aldabergenuly, kemshilikterge jol bermes úshin ákimdikpen birlese otyryp, aldyn ala jumystardy atqarý kerek. Eger de aldyn ala alǵan gazdy satpaı ustap otyrsa nemese shetelge shyǵaratyndaı is-qımyldar júretin bolsa, tıisti sharalar qoldaný qajet»,-dedi.