Bojko agrotehnıka óndirisiniń óskendigi týraly «ertegi» aıtpaýǵa keńes berdi

ASTANA. QazAqparat - QR Parlamenti Májilisi tóraǵasynyń orynbasary Vladımır Bojko Investıtsııalar jáne damý mınıstrliginiń ókiline «ertegi» aıtpaýǵa keńes berdi, dep habarlaıdy QazAqparat.

Májiliste ótken Úkimet saǵaty barysynda QR Investıtsııalar jáne damý vıtse-mınıstri Tımýr Toqtabaev Qazaqstanda aýyl sharýashylyǵy tehnıkasynyń óndirisi 1,7 esege óskenin, ıaǵnı 2015 jyly 21,2 mlrd. teńgege jetkenin atap ótti.

«2014 jylmen salystyrǵanda naqty mándegi óndiris kólemi 1,5 paıyzǵa artty. 5 jylda ınvestıtsııalar 4 esege ósti, 7,8 mlrd. tegege deıin. Kombaındar men traktorlardyń, sondaı-aq basqa da tehnıkanyń jańa óndiristeri quryldy. Búginde aýyl sharýashylyǵy tehnıkasyn shyǵarý boıynsha Qazaqstan kásiporyndarynyń jalpy óndiristik qýaty jylyna 1 545 kombaıyndy, 3 600 traktor men 500 dana jatkany qurap otyr»,-dedi Toqtabaev.

Alaıda baıandamanyń osy saryny Bojkony qanaǵattandyrmady. Osy oraıda depýtat myńdaǵan traktorlar týraly málimetpen kelispeıtinin aıtty.

«Jańa ǵana Asqar Myrzahmetov problemany naqty atap ótti ǵoı... Dál sol jaǵdaı belarýstik kombaındardy jınaý boıynsha Qostanaı kásipornyna qatysty. Olar tájirıbe júzinde birde-bir temirdi ózderi jasap jatqan joq. Sizder kimge ertegi aıtyp jatyrsyzdar?! Olar shyn máninde daıyn kombaındy alady, keıinnen «QazAgrolızıng» arqyly qosymsha qarjyǵa qol jetizip, óte jaqsy ómir súrip jatyr... Mine bul sizderdiń uıymdastyrý, qadaǵalaý boıynsha atqarǵan jumystaryńyz. Osy Úkimet saǵatyna keler aldynda adamdar barlyq derekterdi oqyp, tanysty ǵoı! Kelisemin, sizderde lısakovtyq jatkalar (destelegish) jumys isteıdi, 12 metrlik jaqsy jasalǵan tehnıka. Problema joq. Alaıda, joǵaryda málimetterdi kimge aıtyp jatyrsyz?»,-dep surady V. Bojko.

Óz kezeginde Premer-Mınıstrdiń orynbasary - Aýyl shaýashylyǵy mınıstri Asqar Myrzahmetov buryndary aýyl sharýashylyǵy mashına jasaý kásiporyndary ókilderine dıler qyzmetin atqarý tıimdirek bolǵanyn naqtylap ótti.

«Nelikten? Sebebi, tehnıkany kirgizgen kezde QQS-tiń nóldik mólsherlemesi bolatyndaı zańnama bizde jumys istep turdy. Endi, bul másele Úkimette qaralyp, biz ony alyp tastadyq. Búginde syrttan tasyǵan emes, Qazaqstanda óndirgen tıimdi bolady»,-dedi Myrzahmetov.