Boıjetkendi qorǵaımyn dep qaza tapqan polıtseı «Erligi úshin» medalimen marapattaldy
Oqıǵa oryn alǵan túni polıtsııa qyzmetkeri Azamat Murtbaev Taldyqorǵan qalasyndaǵy dámhana mańynan mas er adamnyń jas qyzǵa tıisip jatqanyn baıqap qalady. Buzaqynyń beıádep áreketinen qyzdy qutqarmaq bolǵan ol dereý kómekke umtylady. Alaıda, ishimdikke eligen basbuzar qolyna pyshaq alyp, arashaǵa kelgen polıtsııa qyzmetkerine shabýyl jasaıdy. A. Murtbaev aýrýhanaǵa jetkizilgenimen, aýyr jaraqattan qaıtys boldy. Medal marqumnyń anasy Alma Murtbaevaǵa tabystaldy.
Eske sala keteıik, Táýelsizdiktiń 25 jyldyǵyna arnalǵan saltanatty sharaǵa Іshki ister departamentiniń, Ulttyq ulannyń jeke quramy, ІІO ardagerleri men qyzmet babynda qaıtys bolǵan qyzmetkerlerdiń týysqandary qatysqan bolatyn.
Jıynda sóz sóılegen oblystyq Іshki ister departamentiniń basshysy, polıtsııa general-maıory Murat Urumhanov qyzmetkerlerdi Táýelsizdik kúnimen quttyqtap, atqarylǵan sharalarǵa da toqtalyp ótti. Onyń aıtýynsha, bıyl Almaty oblysy ákimdiginiń qoldaýymen qaıta jóndeýden ótken Kınologııalyq qyzmet ortalyǵy ashyldy. Turǵyn úımen biriktirilgen 5 ýchaskelik polıtsııa pýnkti qoldanysqa berilgen. Saltanatty shara barysynda departamenttiń 12 qyzmetkeri «Qazaqstan Respýblıkasynyń Táýelsizdigine 25 jyl» mereıtoılyq medalimen, 6 otbasy múshesi Alǵys hatpen jáne estelik syılyqtarmen, sondaı-aq birqatar qyzmetkerler «Quqyq tártibin qamtamasyz etýge qosqan úlesi úshin» medalimen jáne Іshki ister mınıstriniń «Qurmet gramotasymen» marapattaldy.
Sonymen qatar, 25 jas qyzmetker «polıtsııa leıtenanty» arnaıy ataǵyn alyp, Qazaqstan Respýblıkasyna adal qyzmet etýge ant etti.