Boıynda qazaq qany bar aǵylshyn Qazaqstanǵa velosıpedpen keldi

<p>PETROPAVL. KAZINFORM &ndash; Ulybrıtanııa turǵyny Amanjol Nıkolas Mýhamedjanov Makıntaır Kellett Qazaqstanǵa naǵashy jurtyn izdep kelgen.</p>

Amanjoldyń anasy - qazaq, ákesi – aǵylshyn. Olar qazaq jerinde tanysyp, tabysyp, qazir Londonda turyp jatyr.

Ulybrıtanııa azamaty Amanjoldyń qaryndasy men inisiniń de esimderi qazaqsha, Jandos, Toǵjan atty baýyrlary bar.

Foto: Keıipkerden

25 jastaǵy jigittiń mamandyǵy – sáýletshi. 

Amanjol Londonnan shilde aıynda shyǵyp, búkil Eýropany velosıpedpen basyp ótip, Almaty qalasyna qazan aıynda jetken. Sol jerde týystarynyń úıinde qonaqta bolyp, shahardyń ásem jerlerin aralap, jańa jyldyń aldynda Petropavlǵa keldi. 

Foto: Keıipkerden

- Qazaqstanǵa, anamnyń týǵan jerine velosıpedpen kelý meniń armanym edi. Bul saıahatqa bir jyl daıyndaldym. Velosıpedpen saıahattaýdyń óz qıyndyǵy bar, ózimmen birge kóp zat ala almadym. Jolda qoný úshin palatka aldym, jalpy saparǵa shyqpas buryn aldyn ala josparlaý qajet.

Qazaqstan jerine kirgen kezde aýa raıyna qatysty qıyndyqtar boldy. Qatty jelde júrý, dalada qoný fızıkalyq turǵyda qıyn, - deıdi Amanjol.

Foto: Keıipkerden

Saıahatshynyń aıtýynsha, velosıpedi shamamen 2 myń AQSh dollary turady. Saparǵa shyqpas buryn jigit kóligin jolǵa ıkemdep, keı bólshekterin shydamdy bolýy úshin aýystyrǵan. Jolda qalmaý úshin qajetti saımandardy da ózimen birge ala shyqqan.

Jalpy velosıpedpen mundaı alys saparǵa onyń alǵash shyǵýy. 

Foto: Keıipkerden

- Jumsalǵan aqshaǵa Londonnan Petropavlǵa ushaqpen baryp-kelýge bolar edi. Biraq ókinbeımin. Qazaqstan jeri keń-baıtaq eken. Eń tańqaldyrǵany – halqy. Adamdary eń qonaqjaı, meıirimdi. Kelgennen meni qonaqqa shaqyryp jatyr, - deıdi Ulybrıtanııa azamaty. 

Qazir Amanjol Petropavlda týǵan-týystarynyń úıinde qonaqtap jatyr. 

Foto: Keıipkerden

- Amanjol - meniń anamnyń sińlisiniń uly. Er adamdy shyńdaıtyn uzaq saparda bolyp kelip otyr. Biraq jolda kezdesken qıyndyqtary týraly tis jarǵan joq. Jalpy qarapaıym. Osy sapardan kútkeni oıynan shyǵyp otyr. Bizben, týǵan-týysymen tanysýdy maqsat etken bolatyn, anasy týǵan topyraqty basyp, eń bastysy - naǵashy ájesimen kezdespek edi. Alaıda, úlgermedi, ájemiz qaıtys boldy. Sondyqtan bul saıahat Amanjol úshin óte mańyzdy, - deıdi bólesi Aıjan Kolchına. 

Foto: Keıipkerden

Ulybrıtanııa azamaty Petropavlda osy aıdyń jıyrmasyna deıin bolyp, keıin týǵan jerine qaıtpaq. 

Buǵan deıin Petropavldaǵy saýda úıindegi órtke qatysty qylmystyq is qozǵalǵanyn jazǵan edik.