Botaı qonysynda tarıh páni muǵalimderi qazba jumystaryn júrgizedi

PETROPAVL. QazAqparat – Soltústik Qazaqstan oblysyndaǵy Botaı, Aq-Irıı qonystarynda arheologııalyq maýsym ashylyp, qazba jumystary júrgizilip jatyr. Al osy aıdyń 15-inen bastap erte temir ǵasyryna jatatyn Novopavlovka eldi mekeniniń mańyndaǵy qorǵanda, aıdyń sońynda Qyzyl Oba qorymynda zertteý jumystary bastalmaq, dep habarlaıdy QazAqparat tilshisi.

SQO tarıhı-mádenı murany qorǵaý jáne paıdalaný ortalyǵynyń basshysy Raqat Mambetalınovtiń aıtýynsha, Aıyrtaý aýdanyndaǵy Botaı qonysynda qazba jumystaryn júrgizýge Qostanaı ýnıversıtetiniń qyzmetkerleri keldi.

«2022 jyldyń 1 maýsymynda «Botaı» murajaı-qoryǵy eki kezeńdik joba aıasynda Nıkolskoe eldi mekeniniń mańyndaǵy Botaı qonysynda arheologııalyq jumystar bastaldy. Qazba aýmaǵy 192 sharshy metrdi alyp jatyr. Maqsaty – ǵylymı ádister, janama belgiler men uqsastyqtar arqyly ejelgi botaılyqtardyń artefaktilerin, nanymdaryn keshendi jáne egjeı-tegjeıli zertteý. Botaılyqtardyń alǵashqy (protofılosofııalyq), jartylaı mıstıkalyq ómirlik kózqarastaryn, ómir saltyn zertteý. Ekspedıtsııanyń ekinshi mindeti – soltústik óńirde Botaı mádenıetiniń taralý aımaǵyn, biregeı arheologııa eskertkishterin zertteý.

Jylqyny qolǵa úıretý mádenıeti barlyq at-dala órkenıetiniń damýyna yqpal etti. Bul fakti týraly qazaqstandyqtardyń óskeleń urpaǵy bilýi qajet. Sondyqtan, jastar ekspedıtsııaǵa belsendi qatysady. Sonymen qatar, Botaı qonysy Reseı, Germanııa, jaqyn jáne alys shetelderden týrısterdi tartatyn orynǵa aınaldy. Bıyl da jańa ashylýlar bolady dep oılaımyn», - deıdi Raqat Mámbetalınov.

Botaı qonysyna 19 maýsymda óńirdiń tarıh páni muǵalimderi keledi. Keıin olardyń qataryna Almaty, Oral, Shyǵys Qazaqstan oblystarynyń ustazdary qosylady. Osylaısha Botaıdaǵy qazba jumystary jazdyń sońyna deıin jalǵasady.

«Bizdiń jergilikti ýnıversıtettiń tarıhshylary men stýdentteri Dolmatovo eldi mekeniniń mańyndaǵy Aq-Irıı qalashyǵynda qazba jumystaryn bastady. 15 maýsymda Petropavldaǵy Novopavlovka eldi mekeniniń mańyndaǵy qorǵanda jumysqa kirisedi. Ol erte temir dáýirine jatady. Bul aýdanda úılerdiń qurylysy júrip jatyr. Qyzyl Oba qorymynda qazýdy maýsym aıynyń sońynda jalǵastyramyz. Biz taǵy bir mazardy ashýdy josparlap otyrmyz. Tamyz aıynda sol jerde Anglııa, Frantsııa ǵalymdarynyń qatysýymen halyqaralyq dala semınary ótedi. ıÝNESKO ókilderimen Qyzyl Obany tizimge engizý múmkindigi týraly kelissózder júrgizip jatyrmyz. Óıtkeni, Altyn Orda dáýiriniń bul eskertkishindegi eden men qabyrǵalar basqa eshbir eskertkishte osylaısha jaqsy saqtalmaǵan. Bizde Joshy hannyń mazary bar, biraq ol qalpyna keltirilgen. Tamyz aıynda ıÝNESKO ókilderi kelýge ýáde berdi, qyzyǵýshylyq tanytty», - deıdi Raqat Mámbetalınov.