«Botaı - Býrabaı» ashyq aspan astyndaǵy mýzeıine 5 myńnan asa týrıst keldi

KÓKShETAÝ. QazAqparat - Aqmola oblysyndaǵy ashyq aspan astynda ornalasqan «Botaı - Býrabaı» arheologııalyq-etnografııalyq murajaıyna 5 myńnan astam týrıst keldi, dep habarlaıdy QazAqparat tilshisi oblystyq Іshki saıasat basqarmasyna silteme jasap.

Vedomstvonyń habarlaýynsha, «Qazaqstannyń kıeli jerleri» jobasy sheńberinde Aqmola oblysynda kıeli jerlerdiń mədenı-geografııalyq beldeýi jasaldy. Oǵan óńirdegi 200 astam kıeli nysan endi. Olardyń arasynda «Qumaı» arheologııalyq-etnografııalyq kesheni, Oljabaı batyr zıraty, Abylaı han alańy, Kenesary úńgiri, Oqjetpes taýy, «Bespaqyr» mazary, Baýbek batyr kesenesi, Naýan haziret meshiti sııaqty 10 tabıǵı jəne tarıhı nysandar endi.

«Qazirgi kezde, óńirde kıeli oryndardy zerttep, qalpyna keltirý jəne nasıhattaý boıynsha aýqymdy jumystar júrgizilýde», - deıdi vedomstvodan.

Aıtalyq, Shoqan Ýálıhanov atyndaǵy Kókshetaý memlekettik ýnıversıteti, Abaı Myrzahmetov atyndaǵy Kókshetaý ýnıversıteti, QR ІІM TJK KTI stýdentteri Zerendi aýdanynyń Kenótkel aýyly aýmaǵynda uıymdastyrylǵan «Arheologııa - baǵa jetpes qazyna» arheologııalyq ekspedıtsııasyna qatysty.

Qola dáýirindegi tarıhı eskertkishterdi zertteý qorytyndysy boıynsha ekspedıtsııa  músheleri «Balapan» telearnasynyń «Jumbaq jer» televızııalyq jobasyna qatysty.

Budan bólek Býrabaı kýrorty aımaǵynda ashyq aspan astyndaǵy «Botaı - Býrabaı» arheologııalyq-etnografııalyq murajaıy ashyldy.  Neolıt dáýirindegi etnopark óńirdiń týrıstik áleýetin arttyrýǵa zor yqpal etýde. Bir maýsymnyń ózinde bul murajaıǵa 5 myńnan astam týrıst keldi. Aıta ketsek, bul ortalyq osy jyldyń shilde aıynda ashylǵan bolatyn.

Sonymen qatar, Astrahan aýdanyndaǵy «Toǵyz áýlıe» molasy da tarıhshy ǵalymdardyń qyzyǵýshylyǵyn arttyryp otyr. Al Qorǵaljyn aýdany aýmaǵynda Astana qalasynan 100 shaqyrym qashyqtyqta ornalasqan Qazaq handyǵyn qurýshylardyń biri - Jánibek hannyń kesenesi zerttelýde.

Bul búgingi Elordamyzdyń qazaqtyń etnıkalyq jer aýmaǵy qalyptasyp, qazaq memlekettiginiń bastaý alǵan jerinde ornalasqandyǵyn bildiredi.