Botanıkalyq baq qala menshigine beriledi - Almaty ákimdigi

ALMATY. QazAqparat - Almatyda ornalasqan Botanıkalyq baq jyl sońyna deıin qala menshigine beriledi. Bul týraly «Nur Otan» partııasynyń Almatydaǵy bólimshesiniń otyrysynda belgili boldy, dep habarlaıdy QazAqparat tilshisi.

Búginde bul nysan QR Bilim jáne ǵylym mınıstrliginiń balansynda tur.

Qalalyq Tabıǵı resýrstar jáne tabıǵat paıdalanýdy retteý basqarmasynyń habarlaýynsha, búginde 500 ga aımaqta ornalasqan 140 nysan pasporttalyp, ınventarızatsııadan ótken. Bıyl 32 myńnan asa aǵash otyrǵyzý josparda bar.

«2018 jyldyń sońyna deıin Botanıkalyq baqty qala menshigine berý týraly másele tolyq sheshimin tabatyn bolady. Bul nysan asa iri kollektsııalyq ósimdikter qory bolyp tabylady. Munda 2 235 takson, 255 myń joǵary ósimdik, 100 myńǵa jýyq sańyraýqulaq pen qyna túrleri bar», - dedi basqarma basshysy Áset Masabaev.

Jaqynda QR Aýylsharýashylyǵy mınıstrliginiń balansynda turǵan Baým baǵy da qala menshigine berilgen bolatyn.

Qazir ákimdik atalǵan nysandy abattandyrýdy qolǵa alǵan. Munda 20-ǵa jýyq oryndyq, navıgatsııalyq quraldar  ornatylǵan.

Baqtyń ońtústik jaǵynan 4 polıtsııa posty bekitildi. 2 qoǵamdyq dárethana qoıyldy.

Sonymen qatar, 3 jaıaý júrginshiler jolyn, atap aıtqanda Esentaı jaǵalaýy, Tólebaev kóshesiniń Abaı men Gogol arasy, Baıseıitova kóshesiniń Sátpaev pen Qabanbaı kóshesiniń arasyndaǵy bóligin jóndeýge 614,3 mln teńge jumsaldy. Jańa jaıaý júrginshiler jolynyń boıyna 843 japyraqty aǵash otyrǵyzylǵan.