Bosnııa men Gertsegovına tóraǵasy dıplomatııalyq qatynastar tujyrymdamasyn qaıta qaraýdy usyndy

ASTANA. QazAqparat – Bosnııa jáne Gertsegovına prezıdıýmynyń tóraǵasy Jelka Tsvııanovıch álemdegi geosaıası jaǵdaı týraly pikirimen bólisti, dep habarlaıdy QazAqparat tilshisi.

«Biz mýltılateralızm fýnktsııasyn qarastyrýymyz kerek. Bul elderdiń ózara syılastyq qaǵıdattaryna súıene otyryp jumys isteýi úshin kóppolıarly tepe-teńdikti qajet etedi. Ol qazirgiden de joǵary deńgeıde júzege asyrylýy tıis. Álemde keń ári ámbebap yntymaqtastyq platformalaryn paıdalanýǵa qaıta oralý kerek. Osy oraıda BUU jahandyq platforma bola otyryp, óz mıssııasy men negizgi fýnktsııalaryn iske asyrý barysynda belgili bir qıyndyqtarǵa tap boldy», - dedi Jelka Tsvııanovıch Astana halyqaralyq forýmynda.

Onyń aıtýynsha, búginde jahandyq saıasatqa ortaq qurylym qajet.

«Qaýymdastyq qıyndyqtardy sheshý jolynda tym bólektenip ketken. Osy oraıda biz birlesip, jahandyq saıasatty qalyptastyrýda ortaq qurylym qurýymyz kerek. Qazir halyqaralyq qatynastar áskerılenip ketken. Osy oraıda dıplomatııalyq qatynastar men dıalog tujyrymdamasyn qaıta qaraý qajet. Jekelegen elder óz múddesi úshin aımaqtyq qurylymdardy teris jaǵdaıda paıdalanbaýy kerek», - deıdi ol.