Bos oryn joq: Eks-sheneýnik Qýandyq Bıshimbaev áli jumysqa turmady

<p>ASTANA. KAZINFORM — Burynǵy Ulttyq ekonomıka mınıstri Qýandyq Bıshimbaev jazasyn ótep jatqan mekemeden ázirge jumys tappady. Bul týraly ІІM Qylmystyq-atqarý júıesi komıtetiniń baspasóz qyzmeti málimdedi. </p>

«Sottalýshy jazasyn qaýipsizdigi joǵary mekemede ótep jatyr. Bos jumys oryndarynyń bolmaýyna baılanysty jumysqa turmady. Sottalýshynyń kún tártibi Qylmystyq-atqarý júıesi mekemeleriniń ishki tártip erejeleri men qoldanystaǵy Qylmystyq-atqarý zańnamasynyń talaptaryna sáıkes saqtalady», — delingen habarlamada. 

Sondaı-aq, komıtetten Qylmystyq-atqarý kodekstiń 93-babyna sáıkes sottalǵandardyń jeke isine qatysty aqparat jarııa etilmeıtini aıtyldy. 

Eske sala ketsek, osy jazda Qylmystyq-atqarý júıesi komıtetiniń tóraǵasy Teńizjan Jánibekov burynǵy mınıstr Qýandyq Bıshimbaev túzeý mekemesine ótkennen keıin qandaı jumys isteýi múmkin ekenin aıtqan edi. 

Aıta keteıik, bıyl 13 mamyrda Astanada Saltanat Núkenovanyń ólimine qatysty sot protsesi aıaqtaldy.

Sot burynǵy Ulttyq ekonomıka mınıstri Qýandyq Bıshimbaevty áıelin azaptap, óltirgeni úshin kináli dep tapty. Ol 24 jylǵa bas bostandyǵynan aıyryldy.  

Al onyń týys inisi Baqytjan Baıjanov qylmysty jasyrǵany úshin kináli dep tanylyp, 4 jylǵa sottalǵan edi.  

26 maýsymda apellıatsııalyq sot alqasy Bıshimbaev pen Baıjanovtyń úkimin ózgerissiz qaldyrdy.