Boryshkerlerden qaryzdy óndirip alý: Ádilet mınıstrligi negizgi qıyndyqtardy atady

NUR-SULTAN. QazAqparat – Búgin Májilistegi Úkimet saǵatynda Ádilet mınıstri Qanat Mýsın boryshkerlerden qaryzdy óndirip alýdaǵy negizgi qıyndyqty atady, dep habarlaıdy QazAqparat tilshisi.

«Sot tóreligin iske asyrýdyń sońǵy kezeńi retinde májbúrlep oryndatý protsesi tıimdi, jedel jáne ádil bolýǵa tıis. Biraq, ókinishke oraı óndirip alýshylar ózderine tıesili somalardy ýaqtyly jáne tolyq óndirip alýǵa qol jetkize almaıdy», - dedi mınıstr.

Onyń atap ótýinshe, 2021 jyly sot oryndaýshylarynyń is júrgizýinde 9,3 trln somasyna 7 mln (6,7) atqarýshylyq jáne basqa da qujattar boldy. 2,3 mln atqarý qujatynan naqty óndirilip alynǵan soma 300 mlrd teńgegeni quraıdy.

«Negizgi sebepter - zańnamanyń olqylyqtary men boryshkerlerdiń tólem qabiletsizdigi. Ótken jyly ǵana boryshkerdiń tabysynyń nemese múlkiniń bolmaýyna baılanysty óndirip alýshylarǵa 2,4 trln teńgege 608 myń atqarýshylyq qujat qaıtaryldy», - dedi Qanat Mýsın.