Boryshkerler múlikti óndirip alýdan qorǵaý úshin jalǵan bereshek qalyptastyrýda

NUR-SULTAN. QazAqparat - Boryshkerler múlikterin óndirip alýdan qorǵap qalýy úshin jalǵan bereshek qalyptastyrýda. Bul týraly Májilis tóraǵasynyń orynbasary Balaıym Kesebaeva aıtty, dep habarlaıdy QazAqparat tilshisi.

«Taǵy bir másele, boryshtan jaltarý faktilerine asa nazar aýdarý qajet. Sońǵy kezde basqa boryshkerler aldyndaǵy mindettemelerdi oryndaýdan jaltarý, múlikterin óndirip alýdan qorǵap qalý maqsatynda jalǵan bereshekti qalyptastyrý úrdisi paıda bolǵan. Mysaly, jumys berýshiler óz jumyskerlerimen ne úshinshi tulǵalarmen sóz baılasa otyryp, olarmen jalǵan eńbeksharttaryn jasap, qaryz týraly anyqtamalar beretindigi týraly faktiler ashylǵan. Osyndaı qujattardyń negizinde notarıýstar mıllıardtaǵan somalarǵa atqarýshylyq jazbalardy jasaǵan», - dedi ol Májilistegi Úkimet saǵatynda.

Vıtse-spıkerdiń dereginshe, prokýrorlardyń bastamasymen sońǵy eki jylda 5 mlrd teńgege notarıýstar jazbalarynyń kúshi joıylǵan.

«Bul problemany ár kezde prokýrormen tekserý arqyly sheship júrmeı, quqyq buzýshylyqqa jetkizbeı, aldyn alý úshin sharalar qabyldaý kerek dep esepteımiz. Búgin biz depýtattardan atqarýshylyq is júrgizý salasyndaǵy birqatar problemalar boıynsha kóptegen eskertpelerdi, sondaı-aq qundy, paıdaly usynystardy estidik. Óz áriptesterimniń aıtqan pikirlerin sózsiz qoldaımyn jáne búgin otyrysqa shaqyrylǵan memlekettik organdar oń qorytyndy jasaıdy dep úmittenemiz», - dedi Balaıym Kesebaeva.