«Boryshkerge 50 paıyz jeńildik jasalýy múmkin» - BAQ-qa sholý
***
«Egemen Qazaqstan» gazetiniń búgingi sanynda QR Parlamenti Májilisiniń depýtaty Іzbaq Ómirzaqovpen aradaǵy suhbat «Elbasy Joldaýy - el damýynyń serpini» degen taqyryppen berilgen. Basylym tilshisiniń barlyq saýalyna tuşymdy jaýap bergen halyq qalaýlysy «Elbasymyz óz Joldaýynda áleýmettik saıasattyń jańa prıntsıpterine arnaıy toqtalǵan bolatyn. Elimizdiń azamattary úshin ekonomıka men bıýdjettiń ósimine tikeleı táýeldi bolatyn eń tómengi áleýmettik standarttar men kepildikter belgileýimiz kerek. Osyǵan baılanysty bizdiń saılaýshylar memlekettiń zeınetkerlerge, múgedekterge, eńbekke jaramsyzdarǵa, naýqas balalarǵa jáne t.b. áleýmettik jaǵdaıy tómen azamattarǵa ataýly kómek úshin tolyq jaýapkershilik alatynyna rızashylyqtaryn bildirdi», - deıdi.
Keshe elordadaǵy Beıbitshilik jáne kelisim saraıynda Qazaqstan Prezıdenti Nursultan Nazarbaevtyń Qazaqstan halqy Assambleıasyn (QHA) qurý týraly Jarlyǵynyń qabyldanýyna 18 jyl tolýyna arnalǵan jıyn ótti. Osy jaıt arqaý bolǵan maqala el gazeti «Egemen Qazaqstanda» «Birlikti bekemdeýdegi bıik beles» degen taqyryppen berildi. «Sharaǵa qatysyp, sóz alǵan azamattar osydan 18 jyl buryn, ıaǵnı 1995 jyldyń 1 naýryzynda qurylǵan QHA-nyń qurylymyn ulttyq saıasat júıesiniń bir bólshegi sanalatyn organ retinde qarastyrýǵa umtyldy. Sondaı-aq, ony 820-dan astam etnomádenı birlestikterdiń basyn bir arnaǵa toǵystyra otyryp, azamattyq qoǵam men memleket múmkindikterin jumyldyratyn qoǵamdyq kelisim tetigi retinde baǵalady», - dep jazady basylym.
***
«Qazaqstanda sot sheshimderiniń oryndalýyn qamtamasyz etetin «atqarýshylyq óndiris júıesi túbegeıli reformalaný qajet. Bas prokýratýra men Ádilet mınıstrliginiń keshegi vedomstvoaralyq jınalysynda osyndaı baılam aıtyldy. Júıeni jańartý aıasynda biraz jańalyqtar ómirge joldama alýy múmkin», - dep jazady «Aıqyn» gazeti «Boryshkerge 50 paıyz jeńildik jasalýy múmkin» degen taqyryptaǵy maqalasynda. Máselen, basylymnyń atap ótýinshe, Bas prokýror Ashat Daýylbaev óz qaryzdaryn kóp sozbaı, «sóndiretin» boryshkerlerge «dıskont» berýdi usyndy. Bul rette qaryz bolyp qalǵan qazaqstandyqtarǵa 50 paıyzǵa deıin jeńildik jasalýy múmkin.
***
«Mádenı mura» memlekettik baǵdarlamasy aıasynda shetel muraǵattarynda saqtaýly turǵan qazaq tarıhyna qatysty talaı qundy dúnıemen tanystyq. Az ǵana ýaqyttyń ishinde Qazaq eliniń beımálim tustaryn aıqyndaıtyn biregeı jádigerler tabylyp, ǵalymdarymyz Reseı, Ózbekstan, Armenııa, AQSh, Ulybrıtanııa, Germanııa, Qytaı men Egıpet sekildi elderge issaparlary barysynda Qazaqstan tarıhyna qatysty qundy qujattardyń esebin aldy. Áli de bolsa alys-jaqyn shet jurttarda elimizdiń tarıhyna qatysty qundylyqtar jeterlik. Alaıda osynaý qundylyqtarymyzǵa «qol jetkizý qıyn» deıdi keıbir ǵalymdar. «Basqa eldermen alys-beris, qarym-qatynas jaqsarǵan tusta shetel muraǵattaryndaǵy tarıhqa qatysty derekterdi alý qıyn deý - enjarlardyń isi» deýshiler de joq emes. Belgili tarıhshy-ǵalymdar Bolatbek Násenov pen Qanat Óskenbaıdyń osy taqyrypqa qatysty pikirleri «Alash aınasy» gazetiniń «Oı-kókpar» aıdarymen jarııalanyp otyr.
«Bizde óner men mádenıetke barynsha jaǵdaı jasalyp jatyr. Bári bar. Biraq ánshi joq, kúıshi joq, bard joq, shanson joq, folklor joq. Óıtkeni biz óresi bıik ónerdi etnografııanyń deńgeıine deıin túsirip jiberdik. Áli kúnge shyn ónerge boılaı almaı, betinde ǵana qalqyp, «qazaqtyń mynadaı áni, mynadaı bıi bar» dep júrgenimizdi moıyndaýymyz kerek. Bizde qazir ánshi shyǵarǵysh joba kóp, biraq sodan naǵyz ónerliler shyǵyp jatqan joq», deıdi aqyn Qýanysh Maqsutov. Aqynnyń bardtyq ónerge, buqaralyq mádenıet pen prodıýserlik mektepke qatysty basqa da oılaryn «Alash aınasy» gazetiniń «Dat» aıdarynda «Bankettik mádenıetten» qutylmaı, uzaqqa barmaımyz» degen taqyryppen berilgen suhbatynan oqyp-bilińiz.
***
«Kazahstanskaıa pravda» gazetiniń jazýynsha, Qazaqstan Prezıdenti Nursultan Nazarbaev Frantsııanyń Syrtqy ister mınıstri Loran Fabıýsty qabyldady. Memleket basshysy Frantsııanyń syrtqy saıasat vedomstvosy basshysynyń sapary ekijaqty qatynastardyń nyǵaıýynyń joǵary qarqynyn tanytatynyn atap ótti. «Bizdiń elderimizdiń yntymaqtastyǵy serpindi damyp keledi. Úsh aı buryn men Frantsııa Prezıdenti Fransýa Ollandpen kezdestim. Qazir biz onyń Qazaqstanǵa saparyn kútýdemiz. Biz úshin Frantsııa Eýropalyq Odaq elderi arasynda iri ınvestorlardyń birinen sanalady. Qazirgi ýaqytta biz túrli qyzmet salalaryndaǵy 25 birlesken jobany iske asyrýdamyz, ekijaqty ózara is-qımyldy damytý perspektıvalary óte zor», - dedi N.Nazarbaev. Óz kezeginde Frantsııanyń Syrtqy ister mınıstri Nursultan Nazarbaevqa alǵys aıtty jáne frantsýz kóshbasshysynyń shyn peıildi tilegin jetkizdi. Kezdesý barysynda eki eldiń saýda-ekonomıkalyq jáne ınvestıtsııalyq seriktestik máseleleri qaraldy, sondaı-aq halyqaralyq saıasat, óńirlik jáne jahandyq qaýipsizdiktiń keń aýqymdy máseleleri jóninde de pikir almasyldy.