Borıs Djonson depýtattyq ókiletin tapsyrdy

ASTANA. QazAqparat – Ulybrıtanııanyń burynǵy premer-mınıstri Borıs Djonson Ulybrıtanııa parlamenti Qaýymdar palatasynyń depýtaty ókiletin tapsyrdy, dep habarlaıdy QazAqparat VVS-ge silteme jasap.

Keshe Djonson koronavırýs pandemııasyna baılanysty engizilgen lokdaýn kezinde Daýnıng-strıttegi premer rezıdentsııasynda uıymdastyrylǵan saýyq keshin tergegen parlament komıtetiniń áli jarııalanbaǵan esebiniń kóshirmesin aldy.

Baıandama avtorlary Djonson parlamentti ádeıi jańylystyrýǵa tyrysqan degen tujyrym jasady.

Eks-premerdiń ózi esepte «anyq emes tustar men teris pikir kóp» ekenin, al komıtet músheleri ózin parlamentten alastatqysy keletinin málimdedi.

«Olar áli de meniń sanaly túrde nemese baıqamaı Qaýymdar palatasyn jańylystyrǵanyma eshqandaı dálel usynbady», - dep málimdedi ol.

Djonson komıtetke naýryzda bergen jaýabynda parlamentti jańylystyrǵanyn moıyndady, biraq ony ádeıi istegenin joqqa shyǵardy.

Byltyr jazda premer-mınıstr qyzmetinen ketkenimen ol London okrýgteriniń birinen (Aksbrıdj jáne Saýt-Raıslıp) depýtat retinde qalǵan edi.

Endi bul okrýgte merziminen buryn saılaý ótýi kerek.

Djonson Brıtan parlamentine 2001 jyly saılandy. Óziniń málimdeýinshe, parlamentten ketkenimen Djonson saıasattan ketpeıdi.

Borıs Djonson 2019 jyldan 2022 jylǵa deıin Ulybrıtanııa úkimetin basqardy.

Ol kabınet basshysy qyzmetinde bolǵan kezde Ulybrıtanııa resmı túrde Eýroodaqtan shyqty.

Onyń premer-mınıstr laýazymynan ketýine ásirese Partıgeıt (Partygate) degen ataýǵa ıe bolǵan Daýnıng-strıttegi daýly saýyq keshteri sebep boldy.