Borandy kúni jolda qalǵan adamdarǵa kómektesken bir top aqtóbelik marapattaldy
Aqtóbe oblysynyń ákimi Ashat Shaharov búgin borandy kúni qar qursaýynda qalǵan adamdarǵa ystyq tamaq jetkizgen eriktilerdi, oblys ortalyǵynan aýdanǵa baryp, ota jasaǵan dáriger men joldaǵy qaýipsizdikti qamtamasyz etken polıtsııa qyzmetkerlerin marapattady. Sonymen birge tótenshe jaǵdaılar qyzmetkerleri de alǵys hat aldy.
«7 aqpan kúni Áıteke bı aýdandyq aýrýhanasynan aýyr bas-mı jaraqaty bar naýqastyń túskeni týraly aqparat keldi. Es jımaǵan adamdy múlde tasymaldaýǵa bolmaıdy. Sondyqtan men tapsyrmamen jolǵa shyqtym. Aqtóbe qalasynan aýdan ortalyǵyna deıin 300 shaqyrym bolsa, ony 10 saǵat júrip bardyq. Bes saǵat boıy jolda turyp qaldyq. Bizdi polıtsııa qyzmetkerleri tasymaldady. Barǵan soń 2 saǵat boıy ota jasaldy. Biz mundaı jaǵdaıǵa únemi daıyn júremiz. Kez kelgen ýaqytta kómekke barýymyz kerek», - dedi Aqtóbe kópsalaly aýrýhanasynyń neırohırýrgi Nursultan Aıtmýrzın.
Marapattalǵandar arasynda polıtsııa qyzmetkerleri de kóp boldy. Olar tek tártipti baqylamaı, qutqarý jumystaryn da júrgizdi.
«Samara-Shymkent tasjolynda qar qursaýynda qalǵan kólik júrgizýshileri men adamdarǵa kómek kórsetildi. Buǵan deıin ınsýlt alǵan júrgizýshiniń densaýlyǵy qaıta syr bergen eken. Ony kóligime otyrǵyzyp, aýrýhanaǵa jetkizdim. Sonymen birge qar qursaýynda turǵan adamdarǵa tamaq tasyp, boran basylǵan soń kóliktiń júrisine kómektestik», - dedi Aqtóbe oblysy Polıtsııa departamenti patrýldik rotasynyń vzvod komandıri Jeńisbek Muratov.
Búgin barlyǵy 40 aqtóbelik marapattaldy. Sonymen birge jolda qalǵan adamdarǵa qol ushyn sozǵan aýdan, aýyldardaǵy adamdar da alǵysqa bólendi.
«Barsha aqtóbelik janashyrlarǵa raqmet aıtamyn. Aldaǵy qyzmetke sáttilik tileımin. Qıyn kezde adam ysylady, bolashaqta da adal eńbek etetinderińizge esh kúmán joq», - dedi Aqtóbe oblysynyń ákimi Ashat Shaharov.
Foto: Aqtóbe oblysy ákiminiń baspasóz qyzmeti Foto: Aqtóbe oblysy ákiminiń baspasóz qyzmeti Foto: Aqtóbe oblysy ákiminiń baspasóz qyzmeti