Boranda kólikterge jol kórsetip júgirgen qostanaılyq polıtseı marapattaldy

QOSTANAI. QazAqparat — Qostanaı oblysynyń polıtsııa departamenti borandy kúni kólikterge jol kórsetken polıtseı Amantaı Baıjanovty marapattady, dep habarlaıdy QazAqparat vedomstvonyń baspasóz qyzmetine silteme jasap.

Qostanaı oblysy PD bastyǵynyń orynbasary Ardaq Yntyqbaev aıtqandaı, tártip saqshysynyń áreketi qoǵamdyq pikir týdyrdy.

«Eldiń jyly pikirleri áleýmettik jelilerde jarııalandy. Halyq polıtseıge rızashylyǵyn áli de bildirip jatyr. Bul jas mamandarǵa úlgi bolarlyq is», - dep atap ótti ol.

Ardaq Yntyqbaev Amantaı Baıjanovqa marapat qaǵazy men Eltańba beınelengen qolsaǵat tapsyrdy.

Aıta keteıik, borandy kúni polıtseı Amantaı Baıjanov kólikterdiń, avtotizbektiń aldyna shyǵyp alyp, qalaǵa baratyn joldy kórsetý úshin júgirip otyrǵan.

Jeli qoldanýshylary da arnaıy vıdeo jazyp, áleýmettik jelide jarııalaǵan.