Boranda adasyp ketken jambyldyqtar aman-esen tabyldy

TARAZ. QazAqparat – Jambyl oblysynda boranda adasyp ketken úsh turǵyn aman-esen tabyldy, dep habarlaıdy QazAqparat Jambyl oblysy TJD baspasóz qyzmetine silteme jasap.

15 qarasha kúni Jambyl oblysy tótenshe jaǵdaılar departamentine Jýaly aýdany Shymbulaq aýylynyń úsh turǵyny (ekeýi 1974 jylǵy jáne bireýi 1983 jylǵy) saǵat 18:05-te aýyldan 15 km qashyqtyqta taý bókterindegi aýmaqtan traktormen maqsary shabýǵa shyǵyp, kún raıynyń qolaısyzdyǵynan adasyp ketkendigi jóninde habarlama túsken.

Joǵalǵan adamdardy izdestirýge tórt órt sóndirýshi-qutqarýshy, ýchaskelik polıtsııa jáne jergilikti turǵyn jol talǵamaıtyn «TREKOL» kóligimen shyqty. Qarańǵy túsip, boran bastalyp ketkendikten, izdestirý jumystary kelesi kúnge shegerildi.

16 qarasha kúni tańerteń izdestirý jumystary qaıta bastalyp, saǵat 10:35-te joǵalǵan adamdar Shymbulaq aýylynan 40 shaqyrym qashyqtyqta tabyldy. Olar medıtsınalyq kómekke muqtaj bolǵan joq.

Foto: gov.kz