Boran uıytqyp tur: Tótenshe jaǵdaı qyzmeti elordalyqtarǵa eskertý jarııalady

<p>Astanada aýa raıynyń kúrt buzyldy. Atap aıtqanda, burqasyn kóterilip, qar jaýyp tur, jeldiń jyldamdyǵy 28 m/s jetti. Osyǵan baılanysty Astana qalasynyń tótenshe jaǵdaılar departamenti elorda turǵyndary men qonaqtaryna qala syrtyna shyqpaýyn jáne abaı bolý kerektigin eske saldy. Aýa raıynyń ózgerýi jáne engizilgen shekteýler týraly búkil aqparatty baqylaýda ustaý kerek, dep habarlaıdy <a href="https://kaz.inform.kz/" target="_blank" rel="noopener">Kazinform</a>.</p>

«Qazgıdromet» RMK málimetinshe, 29-31 jeltoqsan aralyǵynda Astanada qalyń qar jaýyp, jel kúsheıedi, boran soǵady.

«Daýyldy jel kezinde birinshi kezekte elektr jelileri men jabdyqtarynyń, turǵyn úıdegi jylytý peshiniń jaı-kúıin tekserý, ishki jáne syrtqy órtke qarsy sý qubyrynyń, telefon baılanysynyń jaramdylyǵyn qamtamasyz etý, órtke qarsy daıyndyq jumystaryn júrgizý qajet. Páterde siz joqta kenetten elektr togy qosylǵan kezde órt bolmas úshin búkil elektr qurylǵylarynyń qýatyn óshirip, barlyq tok kózderin ajaratyp ketińiz. Sondaı-aq kólikti aǵashtar men tozyǵy jetken ǵımarattardan alys jerge qoıyńyz. Páterdegi barlyq terezelerdi myqtap japqan jón. Syrtta qatty jelde qalyp qalsańyz, qutqarýshylar qaýipsiz jerdi panalaýǵa keńes beredi. Elorda turǵyndary men qonaqtarynan daýyldy eskertý kezinde jolda saq bolýdy, qaýipsizdik erejelerin saqtaýdy, uzaq saparǵa shyqpaýdy suraımyz» dep keńes berdi TJD mamandary. 

Tótenshe jaǵdaı týyndaǵan jaǵdaıda 112 nómirine qońyraý shalyńyz.

Esterińizge sala keteıik, búgin tańerteńnen beri elordada qar tazalaý jumystaryna 2344 jol jumysshysy men 1200-den astam arnaıy tehnıka jumyldyrylǵan.

Jeltoqsannyń 28-nen 29-yna qaraǵan túni Astanadan 17 myń tekshe metrge jýyq qar shyǵaryldy, bul — 1478 aýyr júk kóliginiń kólemine teń.