Bólimshelerdegi qyzmet kórsetý máselesi sheshildi - Halyk bank

ALMATY. QazAqparat - Qazkommertsbankpen birigý kezindegi «Qazaqstan halyq banki» AQ bólimshelerindegi qyzmet kórsetýge qatysty túıitkildi máseleler sheshildi. Bul týraly basqarma tóraıymy Úmit Shaıahmetova málimdedi, dep habarlaıdy QazAqparat tilshisi.

«Meniń oıymsha ıntegratsııa sátti aıaqtaldy. Barlyq tutynýshylyq derekqor, jalpy aqparat ortaq derekqorǵa aýystyryldy. Servıs deńgeıi qaıta qalpyna keldi dep aıta alamyz. Alǵashqy apta óte aýyr boldy. Biz áleýmettik jelilerden, call-ortalyqtar arqyly bolǵan jaǵdaılardan habardarmyz. Turaqtalý kezeńinen óttik, endi qyzmet kórsetý sapasyn odan ári jaqsartýǵa kúsh salýdamyz», - dedi Úmit Shaıahmetova baspasóz máslıhatynda.

Onyń bergen aqparaty boıynsha, Halyk Bank-tiń taza kirisi bıylǵy jarty jyldyqta 24,1 mlrd teńgege tómendegen. Al jyldyń birinshi toqsanyndaǵy kórsetkish 62,1 mlrd teńgeni quraǵan. Buǵan 30,3 mlrd teńge kólemindegi aqshalaı emes aktıvterdiń qunsyzdanýy, ıntegratsııaǵa baılanysty Qazkommertsbanktiń 43,3 mlrd teńge kólemindegi salyq aktıviniń merzimi ótip ketkendigi tanylmaýy sebepshi bolǵan.

Sondaı-aq, bank basshysy Qazkommertsbank budan ári zańdy tulǵa retinde tanylmaıtyndyqtan quldyraýdyń ýaqytsha ekenin aıtty. Búgin de birikken bankte 13 myń adam qyzmet atqarady.

Eske sala ketsek, shilde-tamyz aılarynda qos banktiń qosylýyna oraı áleýmettik jeli qoldanýshylary uzyn-sonar kezek pen qyzmettiń sapasyz júrgizilip jatqanyna narazylyqtaryn bildirgen bolatyn.