Bolǵan ana Joshy hannyń qyzy ma, kelini me: Japonııa men Ulybrıtanııa zerttedi

NUR-SULTAN. QazAqparat – Qaraǵandy oblysy Ulytaý aýdanynda ornalasqan Bolǵan ana kesenesinen birqatar qundy jádigerler tabyldy. Jáne Bolǵan ananyń keıpi jańǵyrtyldy. Osy oraıda QR Ulttyq mýzeıiniń halyq qazynasy ǵylymı zertteý ınstıtýtynyń basshysy, PhD doktor, arheolog Aıbar Qasenalın QazAqparat tilshisine tarıhı qundy dúnıeler týraly áńgimelep berdi.

«Bolǵan ana eskertkishi Qaraǵandy oblysy Ulytaý aýdanynda ornalasqan. Kesenege arheologııalyq zertteý jumysy 2018 jyly bastaldy. Osyǵan deıingi tarıhı derekter Bolǵan anany Shyńǵys hannyń qyzy nemese kelini dep aıtyp keldi. Biraq sońǵy jyldardaǵy genetıkalyq saraptamanyń aldyn ala nátıjesi boıynsha Joshy hannyń qyzy degen boljam bar. Keseneden qazba barysynda biraz jádiger tabyldy. Atap aıtqanda, altyn tostaǵan, jibek matadan tigilgen shapan, er-toqym, qarý-jaraq jáne taǵy basqa zattar. Jáne tabylǵan zattardyń ereksheligi sol Altyn orda dáýirinen habar beredi. Jáne tabylǵan jádigerler Bolǵan ananyń óz dáýirinde arıstokratııa qoǵamynyń ókili bolǵanyn kórsetedi», - dedi Aıbar Qasenalın.

Onyń aıtýynsha, arheologııalyq qazba jumystarynan bólek zerthanalyq taldaý jasalǵan.

«Mysaly, Bolǵan anaǵa genetıkalyq zertteý Japonııa men Ulybrıtanııada jasaldy. Búgin kórmede Bolǵan ananyń sol kezdegi beınesiniń jańǵyrtpasy qoıyldy. Jańǵyrtpa birneshe antropolog jáne músinshiniń kómegimen júzege asty. Sonymen qatar arheologııalyq qazba jumystary Bolǵan ana kesenesinen bólek, Joshy han, Alasha han kesenelerinde de júrdi. Odan bólek, Aqmola oblysy aýmaǵynda da qazba jumystary jalǵasyp, tabylǵan jádigerler zerttelip jatyr», - deıdi ol.

Aıta keteıik, búgin elordadaǵy ulttyq mýzeıde Bolǵan ana kesenesinen tabylǵan jádigerler men Bolǵan ananyń jańǵyrtylǵan beınesi qoıylǵan kórme ashyldy.