Bolat Zaýytuly: Elbasy sheteldegi qandastarǵa jan-jaqty qoldaý kórsetip keldi
«Elbasy - Ult kóshbasshysy Nursultan Nazarbaevtyń óz ókilettigin merziminen buryn toqtatqany tosyn jaǵdaı boldy. Elbasy - əlemdik saıasattaǵy orny bólek bedeldi tulǵa, búkil túrik əleminiń maqtanyshy edi. Osy təýelsizdik jyldary qazaqtyń Qazaqstan degen eli bar ekenin əlemge tanytyp, moıyndatqan uly saıasatker, ultjandy dara tulǵa retinde bizdiń esimizde qalady. Elimizge jasaǵan qyzmeti óte kóp. Mysal keltirsem, sonaý 1991 jyly Qazaqstan Respýblıkasy Təýelsizdigin alǵan bette sol jyly jańa jyl qarsańynda sóz sóılep, alysta júrgen qandastarǵa arnap «Alystaǵy aǵaıynǵa aq tilek» atty əıgili haty jarııalandy. Taǵdyr aıdap shetelde ómir súrip jatqan qandastardy elge shaqyrdy. Ol hatta «Atamekenge kelemin deýshilerge jol ashyq» degen-di. Búginde təýelsiz elimizde 1,3 mıllıonnan astam qandastarymyz kóship kelip, el damýyna úles qosyp júr. Sol jyldary týǵan balalar búgin qazaq eliniń joǵarǵy oqý oryndaryn bitirip, ərtúrli mamandyqty ıgerip, el ekonomıkasyn órkendetýge óz úlesterin qosyp júrgenin maqtan etemiz», - deıdi Bolat Zaýytuly.
«Dúnıejúzi qazaqtarynyń qaýymdastyǵy» fılıaly tóraǵasynyń sózinshe, 2017 jyly maýsym aıynda Astana qalasynda ótken V quryltaıda Elbasy sheteldegi qandastardyń jaǵdaıyna qoldaý bildirip, olarǵa jan-jaqty kómektesýdi úkimetke tapsyrǵan. Osylaısha, ómirge «Otandastar» qory keldi. Osy qor Dúnıejúzi qazaqtarynyń qaýymdastyǵymen birlesip, qandastarǵa jan-jaqty qoldaý kórsetý, qazaq kóshiniń məselelerin sheshý, alystaǵy aǵaıynmen turaqty baılanys jasaý, sheteldegi qazaq balalarynyń Qazaqstanda bilim alýyna memlekettik grant bólý, oqýshylardy elge shaqyryp gúldengen el ordasy Astanamen tanystyrý sııaqty jumystardy iske asyryp jatyr.
«Osynyń barlyǵy - Elbasynyń tikeleı ultqa degen qamqorlyǵy ekenin shettegi qandastarymyz biledi. Olar Prezıdenttiń eren eńbegin baǵalap, ony tek qazaqstandyqtar ǵana emes, əlemdegi barsha qazaqtyń Ult kóshbasshysy dep tanıtynyn aıtqym keledi. Sondyqtan Elbasy-Tuńǵysh Prezıdent Nursultan Nazarbaevtyń jyldar boıy atqarǵan adal eńbegi úshin elordanyń atyn Nur-Sultan dep ataý - óte oryndy. Elbasy bul qurmetke laıyq», - deıdi «Dúnıejúzi qazaqtarynyń qaýymdastyǵy» RQB Pavlodar oblystyq fılıalynyń tóraǵasy Bolat Zaýytuly.