Bolat Dembaev: Referendýmǵa daıyndyq kezeńinde zań buzýshylyq tirkelgen joq

NUR-SULTAN. QazAqparat – Referendýmǵa daıyndyq kezeńinde birde-bir zań buzýshylyq tirkelgen joq. Bul týraly QR Bas prokýrorynyń orynbasary Bolat Dembaev aıtty, dep habarlaıdy QazAqparat tilshisi.

«Barlyǵy da Referendým týraly konstıtýtsııalyq zań erejesine saı ótip jatyr. Qandaı da bir zań, onyń ishinde úgit erejelerin buzý tirkelgen joq», - dedi Bolat Dembaev Ortalyq referendým komıssııasynyń otyrysynda.

Bas prokýratýra atap ótýinshe, referendým taǵaıyndalǵan kúnnen bastap osy ýaqytqa deıin atalǵan máselege qatysty 18 ótinish túsken. Biraq, onyń birde-biri referendým týraly zańnamanyń buzylǵandyǵy týraly emes.

Bolat Dembaevtyń paıymynsha, referendým týraly zańnamanyń buzylǵandyǵyna qatysty esh shaǵymnyń túspeýi qazirgi protsestiń zańdylyǵyna dálel bola alady.

Al Ortalyq referendým komıssııasynyń múshesi Asylbek Smaǵulov dereginshe, 5 mamyr kúni referendým jarııalanǵan sátten bastap búgingi kúnge deıin Ortalyq referendým komıssııasyna jeke jáne zańdy tulǵalardan 524 ótinish kelip tústi.

Kelip túsken ótinishterdiń 15-ine belgilengen merzimde tolyq jaýap berildi. 500-i Ortalyq referendým komıssııasynyń quzyretine kirmeıtindikten zańda belgilengen tártippen jergilikti atqarýshy organdarǵa jiberildi. 9 ótinish qaralýda. Oryndalmaǵan ótinishter joq.