Bolat Baqaýov: Mal sharýashylyǵynda jaqsy jetistikterge jettik
Bul týraly QR Parlamenti Májilisinde ótken et jáne sút ónimderin óndirýdi, eksporttaýdy damytý taqyrybyndaǵy parlamenttik tyńdaýda Pavlodar oblysynyń ákimi Bolat Baqaýov málim etti, dep habarlaıdy QazAqparat tilshisi.
«Etti mal sharýashylyǵy salasynda salalyq pıramıdalyq qurylymdy qurdyq, ıaǵnı otbasylyq fermalar jelisin, birneshe iri bordaqylaý alańdaryn, etti tereńdetip óńdeý jumysyn jolǵa qoıdyq. Etke negizdelgen mal sharýashylyǵy baǵytynda 13 myń bas maldy qamtıtyn 10 bordaqylaý alańy jumys istep jatyr. Sonymen qatar bıyl 10 myń bas malǵa arnalǵan eki ınvestıtsııalyq jobany iske asyrý bastalady. Bul óz kezeginde oblysta ónerkásiptik bordaqylaý alańdaryna degen suranysty tolyqtaı jabady», - dedi óńir ákimi.
Onyń sózine qaraǵanda, byltyr óńirde 41 veterınarlyq beket salynyp, osy oraıda oblystaǵy veterınarlyq qaýipsizdikti qamtamasyz etýge óz úlesin qosýda.
«Qazir bizde 28 iri jáne orta taýarlyq sút fermasy jumys istep jatyr. Aǵymdaǵy jyly taǵy da 6 sút-taýarlyq fermasy salynyp, keńeıtiledi. Jalpy, mal sharýashylyǵyn keshendi qoldaý sharalary ońtaıly kórsetkishterdi baıqatyp otyr», - dedi B. Baqaýov.
Onyń aıtýynsha, 2019 jylǵy birinshi toqsannyń qorytyndysy boıynsha mal sharýashylyǵy ónimin óndirý kólemi 9,5 paıyzǵa ósip, 16,4 mlrd teńgeni qurady. Sonymen qatar ol búginde Pavlodar oblysynda óndirilgen sary maı Reseı naryǵynda suranysqa ıe ekenin jetkizdi.
Oblysta et eksporty boıynsha jospar asyra oryndalǵanyna toqtalǵan ákim, bıyl bul kólemdi eki esege arttyrý kózdelgenin jetkizdi.