Bolat Aqsholaqov shyǵys óńirdi gazdandyrýdyń 2 nusqasyn atady

ASTANA. QazAqparat – Elimizdiń shyǵys óńiri Reseıden qubyr tartý arqyly gazdandyrylýy múmkin. Bul týraly búgin Úkimet otyrysynda Energetıka mınıstri Bolat Aqsholaqov aıtty, dep habarlaıdy QazAqparat tilshisi.

«Shyǵys óńirlerdi gazdandyrý úshin mınıstrlik 2 nusqany qarastyrýda. Birinshi nusqa - «Qostanaı-Astana-Pavlodar-Semeı-Óskemen» baǵyty boıynsha gaz qubyryn salý. Bul qomaqty qarajat salýdy, salynǵan ınvestıtsııalardyń ótemdiligin qamtamasyz etý úshin tutynýshylarǵa gaz tarıfterin ulǵaıtýdy, sondaı-aq gaz ken oryndarynyń jańa resýrstaryn ıgerýge tartýdy talap etedi», - dedi Bolat Aqsholaqov.

Onyń atap ótýinshe, ekinshi nusqada Qazaqstan men Reseı arasyndaǵy gaz salasyndaǵy yntymaqtastyq jónindegi jol kartasy aıasynda Reseı Federatsııasynan gaz ımporttaýdy kózdeıdi.

«Búgingi tańda Qazaqgaz Gazprommen birlesip, «Reseı Federatsııasy – Qazaqstan Respýblıkasy – Qytaı Halyq Respýblıkasy» halyqaralyq gaz qubyryn salý máselelerin zerdeleý úshin aldyn ala tehnıkalyq-ekonomıkalyq negizdeme ázirleý máselesin pysyqtap jatyr», - dedi mınıstr.