Bolat Aqsholaqov eldiń soltústigi men shyǵysyn gazdandyrýdyń ońaı jolyn atady

NUR-SULTAN. QazAqparat – Elimizdiń soltústigi men shyǵysyn gazdandyrýdyń eń ońtaıly nusqasy - gazdy Reseıden tartý. Bul týraly QR Energetıka mınıstri Bolat Aqsholaqov aıtty, dep habarlaıdy QazAqparat tilshisi.

«Soltústik pen shyǵysty gazdandyrý máselesi birneshe márte talqylandy. Eger biz bul jumysqa búgin kiriskimiz kelse, onda eń ońtaıly nusqa – bul gazdy Reseıden tartý. Ol ekonomıkalyq turǵyda eń ońtaıly nusqa ári gazben jabdyqtaýda da turaqty bolady. Mundaı kelissózdi QazaqGaz kompanııasy arqyly «Gaprommen» júrgizip jatyrmyz. Vedomstvo deńgeıinde de aldyn ala kelissóz júrgizdik. Qazirgi ýaqytta tehnıkalyq sharttary ázirlenip jatyr», - dedi mınıstr Ortalyq kommýnıkatsııalar qyzmetindegi baspasóz máslıhatynda.

Onyń aıtýynsha, bastapqy kezeńde Reseıden 4 mlrd tekshe metr gaz alynatyn bolady. Degenmen, ony elimizdegi kómir stansalarynyń gazǵa kóshýine baılanysty 10 mlrd tekshe metrge deıin jetkizýge múmkindik bar.

«Baǵasy tutynýshylarmyz úshin qoljetimdi bolǵanyn qalaımyz. Bizde Ońtústik pen Nur-Sultan qalasynda baǵa barynsha joǵary ekenin bilesizder. Shamamen osy deńgeıde bolady. Óıtkeni, ol ımporttalatyn gaz. Áli de kelissóz júrgizip, ýaǵdalasý qajet. Túrikmenstanmen de de kelissóz boldy. Biraq, elimizdiń shyǵysy men soltústigin gazdandyrý úshin olardy qarastyryp otyrǵan joqpyz. Óıtkeni, ol jaqtan gaz qubyry tartylmaǵan. Sondyqtan búginde Reseıden qubyr tartý, odan keıin ony bizdiń energııa júıemizben qosý jeńil bolady. Biraq, oǵan da ýaqyt kerek», - dedi Bolat Aqsholaqov.

Foto: ortcom.kz