Bolat Aqsholaqov bıyl qansha tonna munaı ónimderi óndiriletindigin aıtty
«2021 jyldyń qorytyndysy boıynsha munaı ónimderin óndirý 12,7 mln tonnany qurady. Munaı ónimderiniń negizgi túrlerinen: benzın óndirisi – 4,8 mln tonna, dızel otyny – 4,9 mln tonna, mazýt – 2,4 mln tonna jáne avıakerosın – 586 myń tonna. 2022 jylǵa arnalǵan jospar 13,3 mln tonna quraıdy. Sondaı-aq Prezıdenttiń tapsyrmasyna sáıkes Energetıka mınıstrliginiń buıryǵymen 180 kún merzimge munaı ónimderin bólshek saýdada ótkizýge shekti baǵalar mynadaı deńgeıde belgilendi: AI-92 markaly benzın – lıtrine 182 teńge; AI-93 markaly benzın – lıtrine 182 teńge; AI-95 markaly benzın – lıtrine 215 teńge; dızel otyny (jazǵy, maýsymaralyq) – lıtrine 230-260 teńge», - dedi ol mınıstrliktiń keńeıtilgen alqa otyrysynda.
Onyń atap ótýinshe, Prezıdenttiń «Jańa Qazaqstan: jańartý jáne jańǵyrtý joly» atty Joldaýy aıasynda sharýalardy janar-jaǵarmaı materıaldarynyń qajetti kólemimen qolaıly baǵa boıynsha qamtamasyz etý jumystary júzege asyrylatyn bolady.
«Búgingi kúni aýyl sharýashylyǵy taýaryn óndirýshilerdiń kóktemgi egis jumystaryn ýaqtyly jáne turaqty júrgizýi úshin munaı óńdeý zaýyttaryna 1 tonnasyna 212 myń teńge baǵasymen 400 myń tonna dızel otyny (176 teńge/lıtr) bólindi. Jetkizý men saqtaýdy eskere otyryp, óńirge baılanysty boljamdy baǵa aýyl sharýashylyǵy taýaryn óndirýshileri úshin bólshek saýda baǵasynan orta eseppen 15-30 paıyzǵa tómen», - degen Bolat Aqsholaqov táýliktik negizde tıep-jóneltýge baqylaý men monıtorıngti qamtamasyz etýdi vıtse-mınıstr Áset Maǵaýovqa tapsyrdy.