Bolat Aqsholaqov bıtým tapshylyǵynyń basty sebebin atady

NUR-SULTAN. QazAqparat – Qazaqstanda jylyna 1,2-1,3 mln tonna bıtým óndiriletin bolady. Bul jaıynda QR Energetıka mınıstri Bolat Aqsholaqov aıtty, dep habarlaıdy QazAqparat tilshisi.

Ortalyq kommýnıkatsııalar qyzmetindegi baspasóz máslıhatynda mınıstr el Prezıdenti jol bıtýmynyń tapshylyǵyn boldyrmaýdy tapsyrǵanyn atap ótti.

«Júrgizilgen jumys nátıjeleri boıynsha Reseı Federatsııasynan gýdron ımportyna kvota 280-nen 430 myń tonnaǵa deıin, sondaı-aq Aqtaýdaǵy bıtým zaýytynda bıtým óndirisi ulǵaıtyldy. Bul otandyq bıtým óndirýshilerge óndiristi 300 myń tonnaǵa arttyrýǵa múmkindik beredi», - dedi ol.

Bolat Aqsholaqovtyń atap ótýinshe, sonyń nátıjesinde jyl saıynǵy jıyntyq qýaty jylyna 1,2-1,3 mln tonnany quraıtyn bolady. Bul jol qurylysy úshin ishki naryqtyń qajettiligin jabýǵa múmkindik beredi.

«Tapshylyq jol-qurylys kompanııalarynyń bıtýmdy birkelki iriktemeýine baılanysty týyndaıtynyn atap ótkim keledi. Atap aıtqanda, qysqy-kóktemgi kezeńde bıtým óndirýge ótinimder is júzinde kelip túspeıdi. Osyǵan baılanysty mınıstrlik Indýstrııa jáne ınfraqurylymdyq damý mınıstrligimen birlesip, qysqy jáne kóktemgi kezeńde bıtým satyp alý úshin biryńǵaı ónim berýshini aıqyndaý máselesin pysyqtaýda», - dedi mınıstr.