«Bolashaqtyń» 14 stıpendıaty «Shyrmaýyq lıgasy» ýnıversıtetterine tústi

NUR-SULTAN. QazAqparat - «Bolashaq» halyqaralyq baǵdarlamasynyń 14 stıpendıaty AQSh-tyń eń bedeldi JOO-lary enetin top – «Shyrmaýyq lıgasy» ýnıversıtetterine tústi. QazAqparat bul týraly «Halyqaralyq baǵdarlamalar ortalyǵy» AQ-ǵa silteme jasap habarlaıdy.

2022 jyldyń alǵashqy legine engen 14 stıpendıat Garvard, Kolýmbııa, Iel, Prınston, Braýn, Dartmýt, Kornell jáne Pensılvanııa ýnıversıtetterine oqýǵa qabyldandy.

Solardyń biri Aqbóbek Amangeldıeva Kolýmbııa ýnıversıtetine «Qoǵamdyq densaýlyq saqtaý» mamandyǵy boıynsha tústi.

«Pandemııa kenetten bastalǵanda áleýmettik jelilerde COVID-19 emdeý sharalary týraly jalǵan aqparat pen úreıdiń tez taralýynyń kýágeri bolyp, qoǵamdyq densaýlyq saqtaý salasyna nazar aýdara bastadym...

Meniń baǵdarlamamnyń ataýy – bıostatıstıka jáne sozylmaly aýrýlardyń emıdemıologııasy salasyndaǵy qoǵamdyq densaýlyq saqtaý magıstratýrasy. DDU-nyń málimeti boıynsha Qazaqstandaǵy barlyq ólimderdiń 85% sozylmaly aýrýlarǵa baılanysty», - deıdi Aqbóbek Amangeldıeva.

Eske salaıyq, Respýblıkalyq komıssııa sheshimimen bıylǵy jyldyń alǵashqy kezeńinde stıpendııa 199 qazaqstandyqqa taǵaıyndaldy. Jalpy alǵanda, 2022 jyly magıstratýra men rezıdentýrada oqý úshin 385 stıpendııa, doktorantýra baǵdarlamalary boıynsha 60 stıpendııa bólindi. Jyl sońyna deıin Respýblıkalyq komıssııanyń taǵy eki otyrysy ótetin bolady.

«Bolashaq» halyqaralyq stıpendııasyn taǵaıyndaýǵa konkýrstyq irikteýge qatysý úshin qujattar bıylǵy 14 qazanǵa deıin qabyldanady. Taǵylymdamadan ótý úshin qujattar qabyldaý 2022 jylǵy 5 qyrkúıekte bastalyp, 14 qazanǵa deıin jalǵasady.