Bolashaqta Býrabaı kýrorty qalaı ózgeredi

KÓKShETAÝ. QazAqparat – Býrabaı kýrortynda halyqaralyq jáne qalaaralyq avtobýstar aıaldaıtyn, sondaı-aq, jeke taksı turaǵy bar modýldi avtovokzal salynady, dep habarlaıdy QazAqparat tilshisi.

Bul týraly Býrabaı aýdanynyń ákimi Áset Muzdybaev óńirlik kommýnıkatsııalar qyzmetinde óńirdiń 2019 jyldaǵy áleýmettik-ekonomıkalyq damýynyń qorytyndysy jáne aldaǵy josparlary jaıynda ótken brıfıngte aıtty.

«Aýdan ekonomıkasynyń basty baǵyttarynyń biri – týrızmdi damytý. Búgingi kúni «Şýche – Býrabaı» kýrortty aımaǵynyń týrıstik ınfraqurylymyna 178 nysan kiredi.

2019 jyldyń sońynda 22 nysanǵa sanatyna baılanysty «juldyz» sertıfıkaty tapsyryldy. 2020 jyly bul baǵyttaǵy jumystar odan ári jalǵasatyn bolady. 2019 jyly quny 19 mıllıard teńgeden astam ınvestıtsııaǵa 16 týrıstik nysannyń qurylysy júrgizildi. Býrabaı kentinde kópbeıindi keshen jáne «Aq býra» jańa kýrorty aımaǵany salý «Şýche – Býrabaı» kýrortty aımaǵyn damytýǵa septigin tıgizbekshi. Týrısterdi tartýda 29 týrıstik saıahat baǵyty ázirlenip, bekitildi. Laplandııa, Abylaı han alańy jáne Etno aýyl tárizdi týrıstik oryndarǵa «Shale Bus» pılottyq baǵyty ashyldy», - dedi Áset Muzdybaev.

Sonymen qatar, aýdan ákimi aýyl sharýashylyǵy, shaǵyn jáne orta bıznestý damytý máselelerine de toqtaldy.