Bolashaqta adam 200 jyldan artyq ómir súrmeýi tıis degen zań shyǵýy múmkin - qytaılyq mıllıarder Djek Ma

ASTANA. QazAqparat - Bolashaqta adam 200 jyldan artyq ómir súrmeýi tıis degen zań shyǵýy múmkin. Bul týraly búgin Astana ekonomıkalyq forýmynyń plenarlyq otyrysynda Alibaba Group kompanııasynyń negizin qalaýshy jáne Dırektorlar keńesiniń tóraǵasy Djek Ma málim etti.

«Meniń oıymsha, qoldanystaǵy tehnologııalardyń múmkindigimen aldaǵy 30-40 jylda adam óziniń aǵzasynyń kodyn tolyqtaı ashyp, máńgilik ómirdiń dári-dármegin oılap tabady. Adamzat ómiri uzaryp, qaterli isik problemalaryn sheshe alady. Osy rette bolashaqta birde-bir adam 200 jyldan artyq ómir súrmeýi tıis degen zań shyǵýy múmkin», - deıdi Djek Ma.

Onyń paıymynsha, bolashaqta ǵalamsharda robottar kóbeıýi yqtımal, olar adamǵa qyzmet etip, keı salalarda adamdardy almastyrýy múmkin.

«Robottar uıqy, jalqaýlyq degendi bilmeıdi. Olarǵa qyzmetteri úshin tek elektr energııasy ǵana kerek. Sondaı-aq robottarda umytshaqtyq degen joq. Sondyqtan da adam ózin tehnıkamen salystyra almaıdy»,-deıdi sarapshy.

Onyń aıtýynsha, búginde álem eleýli ózgeriske ushyrady, tehnologııalar kez kelgen eldiń damýy úderisine yqpal etedi.

Esterińizge sala keteıik, qytaılyq bıznesmenniń dáýleti búginde túrli esepteýler boıynsha 30 mlrd. dollardan asty. Djek Ma qurǵan Alibaba saýda tuǵyrnamasy aınalymy boıynsha Amazon jáne eBay-dan ozyp keledi.