Bolashaq jýrnalıstiń ustahanasy – aýdıtorııa nemese ýnıversıtettiń ishi emes - Erlan Sydyqov

NUR-SULTAN. QazAqparat – Ár telearna men radıoarnada jýrnalıstıka kafedralarynyń fılıalyn ashý kerek. Bul týraly L. N. Gýmılev atyndaǵy Eýrazııa ulttyq ýnıversıtetiniń rektory Erlan Sydyqov málim etti, dep habarlaıdy QazAqparat tilshisi.

«Bolashaq jýrnalıstiń ustahanasy – aýdıtorııa nemese ýnıversıtettiń ishi emes, BAQ qaınaǵan orta, mekeme. Mysaly, Qazmedıa ortalyǵynda, ár telearna men radıoarnada jýrnalıstıka kafedralarynyń fılıalyn ashý – eń birinshi osy aqparat mekemelerine kerek. Stýdentter sol jerde júrýi kerek. Sol kezde ǵana stýdentter jýrnalıstik tsehty sezinip, aqparat daıyndaý úderisine tolyq sińise alady», - dedi E. Sydyqov onlaın-formatta «Qazaqstan Respýblıkasyndaǵy jýrnalıstıka deńgeıi» taqyrybynda ótken talqylaý barysynda.

Sonymen qatar EUÝ rektory ýnıversıtet aıasynda kásibı sheberlikti arttyrý kýrstaryn ashyp, túrli mamandyqty qosymsha jýrnalıstıkaǵa tartýdy da qarastyrý kerektigin atap ótti.

«Áıtpese, mysaly, mamandanǵan ekonomıst-jýrnalıst, sotsıolog-jýrnalıst, zańger-jýrnalıst jáne basqalary aýadaı qajet. Osylardyń barlyǵyna qosymsha bilimdi ýnıversıtter berýi kerek», - dedi Erlan Sydyqov.

Buǵan deıin EUÝ rektory jýrnalıst daıarlaý úderisine «avtorlyq bilim baǵdarlamalaryn» engizýimiz kerektigin aıtqan bolatyn.