«Bolashaq» úmitkerlerinen frantsýz tilin tegin oqýǵa ótinim qabyldaý bastaldy

ASTANA. QazAqparat – Tehnıkalyq qyzmetkerler men IT mamandary bir jyl boıy tegin frantsýz tili kýrstarynan óte alady, dep habarlaıdy QazAqparat «Halyqaralyq baǵdarlamalar ortalyǵy» AQ baspasóz qyzmetine silteme jasap.

Daıyndyq Astana, Almaty, Qaraǵandy, Qostanaı jáne Shymkent qalalarynda ornalasqan Frantsýz Alıansynyń ortalyqtarynda ótedi.

«Halyqaralyq baǵdarlamalar ortalyǵy jáne Frantsııanyń Qazaqstandaǵy Elshiligi arasyndaǵy kelisimniń arqasynda qazaqstandyq tehnıkalyq qyzmetkerler men IT mamandar bir jyl boıy tegin frantsýz tili kýrstarynan ótýge múmkindik aldy. Bul – frantsýz tilin bastaýysh deńgeıden meńgerýdi qalaıtyndar úshin, sondaı-aq kásibı deńgeıde meńgerýge nıet bildiretinder úshin keremet múmkindik», - dep atap ótti Halyqaralyq baǵdarlamalar ortalyǵynyń Basqarma tóraǵasy Oljas Sákenov.

Konkýrstyq irikteýge jasy 35-ke tolmaǵan ınjenerlik-tehnıkalyq saladaǵy jas mamandar qatysa alady. Sonymen qatar, úmitkerler dıplomynyń ortasha baly – GPA keminde 4.00-den 3.00 bolýy kerek.

Konkýrsqa qatysý úshin ótinimder 25 maýsymǵa deıin qabyldanady. Konkýrstyq irikteý men tildik daıyndyqty Frantsııanyń Qazaqstandaǵy Elshiliginiń qoldaýymen Frantsýz Alıansy ótkizedi.

Esterińizge sala keteıik, 2023 jyldan bastap ınjenerlik-tehnıkalyq qyzmetkerler «Bolashaq» stıpendııasyn taǵaıyndaý konkýrsyna jeńildetilgen sharttarmen qatysady. Tehnıkalyq qyzmetkerler qujat tapsyrǵan kezde sheteldik JOO-ǵa óz betimen túsýge mindetti emes. Olardyń stıpendııa taǵaıyndalǵannan keıin baǵdarlama aıasynda bilim alýǵa usynylǵan ýnıversıtetter tiziminen oqý ornyn tańdaýǵa múmkindigi bar.

Buǵan deıin habarlaǵanymyzdaı, 5 maýsymda «Bolashaq» baǵdarlamasy aıasynda qujat qabyldaýdyń úshinshi legi bastalady.