«Bolashaq» túlekteri qazaqstandyq oqýshylarǵa kómektespek
Jobaǵa 9-11 synyp oqýshylaryna mamandyq tańdaýǵa kómektesýge nıet bildirgen baǵdarlama túlekteri qatysady. Sondaı-aq olar óz bilimderi jáne daǵdylarymen bólisedi ári bir jyl kóleminde oqýshylarǵa tálimger bolady. Joba 13 qyrkúıekte Túrkistan oblysynda bastaldy.
«Bul jaı ǵana test nemese saýalnama toltyrý emes, bul naǵyz mamandyq tańdaýǵa kirisý: kezdesýler, oqytý jáne túsindirý semınarlary, master-klastar jáne tálimgerlerdiń keńesteri. «Bolashaq» baǵdarlamasy sheńberinde 11 myńnan astam joǵary bilikti maman daıarlandy. Búginde olar ekonomıkanyń basym sektorlarynda jumys isteıdi. Álbette, olardyń aqysyz usynys bildirgenimizge qoldaý kórsetkenderi qýantady. Oqýshylarmen mundaı qarym-qatynas jáne ózara is-qımyl balalardyń mamandyq tańdaýyna oń áser etedi dep úmittenemiz», — dedi «Halyqaralyq baǵdarlamalar ortalyǵy» AQ vıtse-prezıdenti Ǵalııa Dosmuhambetova.
Mentor-baǵdarlama túlekteriniń qatarynda ınjenerlik-tehnıkalyq, medıtsınalyq, gýmanıtarlyq jáne jaratylystaný ǵylymdarynyń doktorlary bar.
«Kolýmbııa ýnıversıtetinde oqyp júrgen kezimde men kóptegen eriktilerdiń jobalaryna qatystym. Bul jobalar maǵan da, men járdem kórsetken adamdarǵa da jaqsy tájirıbe alýǵa kómektesti. Ádette, jobaǵa qatysýshylar qoǵamnyń damýyna, bilim berý sapasyn jaqsartýǵa jáne bolashaq urpaqtyń ómir súrý deńgeıin arttyrýǵa qosqan úlesterin maqtan tuta alady. Mundaı jumystyń nátıjelerin birneshe jyldan keıin kórýge bolady. Máselen, men óz stýdentterimniń kásibı saladaǵy jetistikterin kórip otyrmyn. Osyndaı tájirıbeni men qazaqstandyqtardyń jas býynynyń damýyna da engizgim keledi», — dep atap ótti Qazaqstan qarjygerler qaýymdastyǵy janyndaǵy jetekshi analıtık, «Bolashaq» stıpendııalyq baǵdarlamasynyń túlegi Ramazan Dosov.
Bul jobaǵa tálimgerler tegin qatysady. Osylaısha, «Bolashaq»baǵdarlamasynyń 150-den astam túlegi mentorlyq boıynsha erikti atandy.